Како детски психолог, Микеле Борба во текот на својот работен век многупати се среќавала со деца на кои им била потребна помош, најчесто емоционална. Како што објаснува, психички послабите деца се поподложни на негативни влијанија од околината. Затоа решила да открие која вештина најмногу ги разликува ментално силните деца од оние кои се откажуваат, но и како самите родители можат да ја поттикнат кај своите деца.
„Пандемија, вооружено насилство, климатски промени… Како психолог, за жал, имав можност од прва рака да видам како вознемирувачките настани на денешницата оставаат последици за нашите деца. „Неодамна едно 11-годишно дете ми рече дека му е тешко да престане да размислува за лоши работи, што ме поттикна да размислувам за тоа што им се случува на децата за сè почесто да ги имаат овие негативни мисли“, изјави таа за CNBC.
Ментално силните деца никогаш не губат надеж
„Без прави алатки за справување со неволјите, може да се појави безнадежност и целокупната благосостојба на децата може да се влоши. Надежта е она што им дава енергија да останат ментално силни во тешките моменти и тоа е она што ги разликува од оние кои лесно се откажуваат“, објасни таа. Имено, таа тврди дека ментално силните деца ја разбираат важноста на надежта и колку и да им е тешко, секогаш размислуваат позитивно.
Истражувањата покажуваат дека надежта може драматично да ја намали анксиозноста и депресијата кај децата
Истражувањата покажуваат дека надежта може драматично да ја намали анксиозноста и депресијата кај децата. Децата кои веруваат имаат подобро чувство за контрола и ги гледаат предизвиците и пречките како привремени и надминливи, така што тие имаат поголема веројатност да напредуваат и да им помагаат на другите. Сепак, и покрај нејзината огромна моќ, ова е вештина што повеќето родители не успеваат да ја всадат кај своите деца.
Психолот објаснува деја постои добра вест, а таа се крие во тоа дека надежта кај децата може да се научи. „Еден од најдобрите начини да се зголеми надежта е да се опремат децата со вештини за справување со неизбежните животни удари, а постојат и научно поткрепени начини кои на родителите можат да им помогнат да ја задржат надежта, особено во тешки времиња кај своите деца“, објаснува Борба.
Како можат родителите да помогнат?
Една од најважните работи, советува психологот, е да се запре негативноста уште на самиот почеток. Имено, неоправданиот песимизам ја јаде надежта, па затоа е важно да им се помогне на децата да престанат да размислуваат негативно пред тоа да им стане навика. Покрај тоа, родителите треба да развијат позитивна мантра кај децата бидејќи зборовите имаат голема моќ.
„Помогнете му на вашето дете да развие оптимистичка мантра која потоа ќе ја користи во сите тешки моменти. Позитивното размислување е буквално нешто што треба да се научи и да се практикува. Притоа, немојте да заборавите ниту на сопственото однесување бидејќи вашето дете постојано ве набљудува и учи од вас“, предупредува Борба.
