Директорката на Клиничко-болничкиот центар (КБЦ) „Бежаниска коса“ во Белград, д-р Марија Здравковиќ вели дека последиците од Ковид-19 кај пациентите кои ја прележале болеста се најзабележливи на кардиоваскуларниот и респираторниот систем.
„Намален капацитет за дишење, разни промени од опструктивно-рестриктивен тип, потоа фокални миокардитиси кои во пракса се рефлектираат преку аритмии. Најчесто тие аритмии не се толку опасни, но има и такви кои се опасни по живот“, изјави д-р Здравковиќ за РТС.
- Докторката објаснува дека не е правило пациентите кои имале потешка клиничка слика да имаат и потешки последици од Ковид-19, но посочи дека кај оние кои имале некое хронично заболување тоа е забрзано и влошено за време на Ковид-19.
„Тоа го гледаме секој ден, или понапредната фаза, или срцева слабост, која ја има многу често после Ковид, или понапредната коронарна срцева болест, понапредната бубрежна инсуфициенција. Пациентите кои страдааат од некое заболување на белите дробови навистина имаат посериозни компликации“, рече таа.
Д-р Здравковиќ објасни и дека најдобро закрепнуваат луѓето кои биле во добра физичка кондиција пред да се разболат од Ковид, пренесува Н1.
