Штотуку дојдовте дома од родилиште со бебето и не сте сигурни на која температура треба да се загрее просторијата во која престојува детето. Многу родители стануваат вистински експерти за температурата во просторијата каде што престојува нивното новороденче. Ова обично значи почесто да се гледа во термометарот и постојано да се вклучува и исклучува греењето.
Која е оптималната собна температура?
Новороденчињата немаат доволно развиен механизам за терморегулација, па затоа е важно секогаш да бидат соодветно затоплени. Американската академија за педијатрија предупредува да внимаваме на превисоките температури, бидејќи некои студии ја поврзуваат вруќината со синдромот на ненадејна смрт на доенчиња. Излегува дека преголемата топлина им го отежнува будењето на бебињата, така што контролата на температурата и избегнувањето премногу слоеви облека е дефинитивно нешто на што родителите треба да обрнат внимание.
Американската академија за педијатрија предупредува да внимаваме на превисоките температури, бидејќи некои студии ја поврзуваат вруќината со синдромот на ненадејна смрт на доенчиња
Многу новопечени родители, плашејќи се од студот, знаат да ја прегреат просторијата во која престојува бебето, заборавајќи дека здравствените експерти препорачуваат одржување на температурата помеѓу 20 и 22 степени со влажност од околу 50 %.
Совети за загревање на бебето во постудените месеци
- избегнувајте да ставате капа на бебињата во затворени простори бидејќи лесно може да дојде до прегревање, со кое вашето бебе не може да се справи,
- ако се сомневате во слоевите на облеката, запомнете дека на бебињата им треба еден екстра слој на облека од она што вие го носите,
- внимавајте да не претерате во слоевите облека,
- внимавајте на јорганите и ќебињата за да не го прегреат бебето или да не доведат до синдром на ненадејна смрт на доенчиња,
- чувајте ги сите греалки на безбедно растојание од креветчето на бебето за да не греат директно во детето.
Американската академија за педијатрија, исто така, јасно препорачува бебињата да бидат соодветно облечени за спиење во лесна облека од материјал што дише.
