Парламентот на Флорида усвои Закон за забрана на социјалните мрежи за деца под 16 години, потег што поддржувачите велат дека ќе ги заштити малолетниците од онлајн ризиците за нивното ментално здравје.
Мерката, која сега е на потпис кај гувернерот Рон ДеСантис, бара од социјалните мрежи да ги укинат сметките на секој помлад од 17 години. Претставничкиот дом го усвои законот со 108 гласа „за“ и седум „против“, неколку часа откако Сенатот го даде конечното одобрување.
ДеСантис, кој не откри дали ќе ја потпише мерката, минатиот месец изрази загриженост за потенцијалното прекршување на правата на приватност.
Поддржувачите изјавија дека законот ќе ги заштити децата од штетните ефекти на социјалните мрежи, како што се анксиозност, депресија и други ментални болести и ќе им користи на оние кои прекумерно користат такви платформи.
Критичарите велат дека законот го прекршува Првиот амандман на Уставот на САД, кој гарантира слобода на говор и дека родителите, а не владата треба да носат такви одлуки.
Во март 2023 година, Јута стана првата американска држава што донесе закони за регулирање на пристапот на децата до социјалните мрежи, а наскоро ќе им се придружат и Арканзас, Луизијана, Охајо и Тексас, според анализата подготвена пред нацрт-законот на Флорида. Во анализата се вели дека и голем број други сојузни држави размислуваат за слични регулативи.
