Веројатно сте слушнале дека некои идни татковци можат да добијат стомак за време на бременоста на својата партнерка, но стомакот и вишокот килограми не се единствените работи што може да им се случат. Всушност, некои мажи може да развијат низа емоционални и физички симптоми на бременоста и, иако звучи чудно, тоа се случува почесто отколку што мислите.
За оваа појава постои дијагноза, а еве што велат експертите за нејзините причини. Синдромот Couvade е термин кој ја опишува мимикријата на симптомите на бременост кај мажите. Иако научниците сè уште го проучуваат, тоа не се смета за болест ниту психолошка состојба, туку само за симптоматска појава.
Некои мажи може да развијат низа емоционални и физички симптоми на бременоста и, иако звучи чудно, тоа се случува почесто отколку што мислите
Најчестите симптоми кои идните татковци ги чувствуваат се гадење, анксиозност, промени во апетитот, намалено либидо и забоболка, а тие имаат тенденција да го достигнат својот врв во третиот месец од бременоста, односно во моментите кога жените имаат најизразени утрински мачнини и други труднички тегоби.
Како што пренесува „Good Therapy“, истражувањето спроведено на оваа тема покажало дека Couvade синдромот станува се почест и се јавува кај 25 до 52 проценти од мажите во САД, чии партнерки се бремени.
Иако е можно да доживеат посериозни симптоми, многу мажи имаат само благи симптоми. Со оглед на тоа што симптомите обично исчезнуваат по породувањето, оваа состојба може да помине незабележана. Некои мажи може да се чувствуваат збунети, загрижени или вознемирени, а експертите велат дека најважна во овој случај е едукацијата.
Исто така, може да биде охрабрувачки да се знае дека овој синдром често се опишува како реакција на промените што ги носат бременоста и родителството, а не како знак на проблем со менталното здравје.
