Пластичните хирурзи неретко се соочуваат со пациентки кои бараат подигање на дојките, со објаснување дека “по доењето им се опуштиле“. За да утврдат дали навистина постои поврзаност помеѓу доењето и опуштеноста на градите, пластичен хирург од САД, спровел истражување.
Пластичниот хирург Брајан Ринкер се надева дека неговото сознание ќе им помогне на жените да не стравуваат за својот физички изглед по периодот на доење на детето.
НЕМА РАЗЛИКА КАЈ ЖЕНИТЕ КОИ ДОЕЛЕ И КОИ НЕ ДОЕЛЕ
Тој, со своите колеги од Универзитетот во Кентаки одлучиле да спроведат истражување во кое учествувале 132 жени кои во период осум години одлучиле да направат операција за зголемување или подигање на градите. Повеќето жени најмалку еднаш биле бремени, а 60 проценти од нив доеле најмалку едно дете. Тимот на научници собрал податоци од секоја пациентка, меѓу кои биле податоци за телесната тежина, висина, големината на градникот што го носеле за време на бременсота и дали некогаш пушеле.
По деталната анализа, било утврдено дека нема разлика во нивото на птозата, што е клиничко име за опуштеноста на некој орган, меѓу жените кои доеле и оние кои не доеле, но утврдиле дека нивото на опуштеност на градите се зголемувало со бројот на родени деца, при што еден од важните фактори било и пушењето.
“Пушењето го разградува сврзно-ткивниот протеин кој се наоѓа во еластичните влакна на кожата, односно еластинот, кој е одговорен за затегнатоста на кожата која ги ‘држи’ градите“, објаснува д-р Ринкер. Тој напоменува дека една од причините за опуштеноста на градите кај некои жени може да биде и носењето на несоодветен вид на градник.
