„Главата на моето бебе претерано се поти, дали треба да бидам загриженa? Ова е само едно од прашањата, една од грижите што ја споделуваат мајките на бројните форуми посветени на родителството. Зошто се потат главите на бебињата, дали оваа состојба е опасна и како може да се спречи?
Постојат многу причини за овој феномен. Прво, најлогично е да се провери како е облечено детето. Споредете ја неговата облека со облеката што ја носите самите. Ако е топол летен ден и носите лесна облека, треба да ја изберете истата гардероба за вашето дете. Кога го подготвувате за спиење и го ставате во кревет, изберете тенко ќебе – топлите волнени ќебиња се посоодветни за зима.
Експертите исто така истакнуваат дека младите мајки треба да бидат свесни дека новороденчињата поголемиот дел од времето го поминуваат во најдлабоката фаза на спиење, што значи дека многу е поголема веројатноста да се потат и да се разбудат со влажни глави.
Ако на ова се додаде фактот дека главата на новороденото дете сочинува значителна површина на неговото тело, не е чудно што таа се „оросува“. Од друга страна, иако оваа појава е нормална, доколку се случува во голема мера, веќе може да биде аларм за посета на лекар. Прекумерното потење на главата кај бебињата може да биде предизвикано од инфекција или знак за вродена срцева мана.
Исто така, треба да знаете дека телото на бебето е сè уште неразвиено и дека не „работи“ со полн потенцијал, особено не е регулирано воспоставувањето и одржувањето на основната телесна температура. Детето можете да го ставите во креветчето со потполно сува глава, а кога ќе се вратите во собата, ќе видите дека забележливо се испотило. Немојте да се чудите ако поминат неколку месеци пред неговото тело да научи нормално да ја регулира телесната температура. Со текот на времето ќе забележите дека се почесто се буди со сува глава!
