Гвен Стефани (51) е веќе долго време во врвот на светската музичка сцена. Oсвен на музичкото поле, таа се има остварено и во улогата на мајка – имено, Стефани има три сина со поранешниот сопруг Гевин Росдејл. За време на неодамнешното ТВ гостување, пред јавноста откри дека страда од дислексија, а тоа го дознала откако нејзините синови имале проблеми со читањето.
„Сфаќам дека многу од проблемите што ги имав или дури и одлуките што сум ги донела произлегуваат од тоа, бидејќи сега моите деца – очигледно тоа е генетско – имаат некои од тие проблеми“, раскажа таа.
Но, Стефани исто така истакна дека нејзините деца (Кингстон, Зума и Аполо) добиваат поддршка на училиште каде што нивната работа ја следат „неверојатни наставници“.
„Не мора да се срамат поради тоа. Тие разбираат дека нивниот мозок функционира на поинаков начин“, објасни таа.
Стефани ја допре и темата за сопственото школување. Вели дури сега ги разбира борбите низ кои поминувала како дете и сфаќа дека дислексијата е виновна за тоа што била лоша ученичка. Имено, дислексија е нарушување на читањето и учењето, а често се манифестира и преку лош правопис и потешкотии во пишаниот јазик. Како што вели Гвен, таа била добро дете и никогаш не правела лоши работи, но на училиште функционирала многу тешко.
Денес, таа верува дека фактот дека нејзиниот мозок „функционира поинаку“ е всушност подарок што многумина не можат да го разберат. Таа исто така зборуваше за тоа како музиката, без сомнение, и помогнала да ги надмине борбите со кои се соочувала поради дислексијата, пренесува BuzzFeed.
„Ништо од ова не знаев до сега, но мислам дека во тоа време немав доверба во себе. Кога ќе напишев песна или ќе излезев на сцена, едноставно чувствував дека тоа е исправно и дека тоа е единствената работа која ми одеше како што треба“, додаде популарната пејачка.
ПРОЧИТАЈТЕ И…
