Хрватскиот научник Игор Рудан со објава на социјалните мрежи предупреди за ситуацијата во Данска, која поради ширењето на коронавирусот, планира да усмрти 17 милиони канадски куни. Неговата објава ја пренесуваме интегрално
Стравувањата се дека таквата мутирана варијанта може да ги поткопа сите досегашни напори за производство на вакцини во светот, бидејќи вакцините што во моментот се тестираат не би не заштитиле од неа
„Се надевав дека ова е лажна вест, но се чини дека не е така. Значи, на северот на Данска, која е најголем извозник на крзно од канадски куни, дванаесет лица се заразиле со варијанта на новиот коронавирус, кој претходно преминал од луѓето на куните па мутирал кај куните и сега повторно ги инфицирал луѓето. Напоменувам дека е важно сето ова сè уште добро да се провери, но приказната ја објавија „Њујорк Тајмс“, „Фајненшл Тајмс“ и „Ал Џезеира“, кои обично се многу претпазливи.
Данска, инаку, заработува повеќе од милијарда евра годишно од продажбата на крзното, а најмногу извезува во Кина. Првите извештаи на данските епидемиолози зборуваат за нивна голема загриженост, бидејќи новата варијанта на вирусот, наводно, го ослабува производството на антитела, иако сè уште не им е јасно како, па сега ќе мора да почекаме за нивните извештаи и да дознаеме многу повеќе за тоа. Стравувањата се дека таквата мутирана варијанта може да ги поткопа сите досегашни напори за производство на вакцини во светот, бидејќи вакцините што во моментот се тестираат не би не заштитиле од неа.
На тој начин, таа нова варијанта на вирусот, барем начелно би можела да започне сосема нова пандемија. Уште еднаш напоменувам, во светло на досегашните искуства, дека ова, засега се само начелни можности, а никако докажани. Вирусот постојано мутира и кај луѓето, уште од самиот почеток изјавив дека може да мутира и во смисла на поголема или помала стапка на ширење и поголема или помала патогеност. Сепак, додека се обидуваме да го контролираме ширењето меѓу луѓето и постојано ги проучуваме мутациите што се насобираат за време на пандемијата, никому не му е драго да дознае дека тој се шири неконтролирано и меѓу милиони единки од друг вид, па потоа може повторно да скокне назад на нас.
Првите извештаи на данските епидемиолози зборуваат за нивна голема загриженост, бидејќи новата варијанта на вирусот, наводно, го ослабува производството на антитела, иако сè уште не им е јасно како
Ова го прави грипот, па затоа секоја година повторно и повторно чекаме каква нова варијанта на вирус на грип ќе не снајде. Научниците допрва треба да добијат податоци на увид за новата варијанта на вирусот од Данска, но колку е сериозно сфатен овој епидемиолошки инцидент, покажува и фактот дека данската влада, која моментално е во самоизолација, одлучила во неколку дена да ги убие сите 17 милиони канадски куни во Данска, а на одгледувачите да им ја надомести штетата.
За да бидат работите уште понезгодни, заразата на куни со коронавирус беше пријавена уште летово во Шпанија, а во последните неколку недели и на фарми во Холандија и во американските сојузни држави Јута и Висконсин. Новиот вирус, очигледно, пронашол уште еден природен резервоар во кој ќе може да мутира и потоа повторно да не напаѓа со нови варијанти. Тоа, за жал, за нас не е добра вест, а уште полоша е за канадските куни“, напиша Рудан.
