Новороденчето често ика, а нормално е тоа да трае дури и до осум минути. Научниците сметаат дека тоа е поради тоа што така учат да го контролираат дишењето. Тогаш им се поврзуваат двата мозочни бранови со чувството во градите, а третиот е реакција на звукот поврзан со контракциите. Икањето предизвикува ненадејно движење на дијафрагмата, па мозокот го „тренира“ бебето да го контролира тој мускул.
Една студија утврдила дека икањето кај бебињата најчесто се јавува ако во текот на хранењето проголтаат многу воздух, иако точната причина е непозната. Можно е бебето да почне да ика, ако премногу јадело, пребрзо јадело или ако проголтало премногу воздух. Сепак, ако премногу често се случува и бебето ви делува вознемирено, тоа може да биде знак за некој здравствен проблем.
Превенцијата е секогаш подобра од лекувањето, така да најдобро е да се обидете да спречите икање. Хранете го бебето почесто, со помали оброци за да не се прејаде. Ако слушнете гласен звук додека бебето јаде, проверете дали добро го држи шишенцето во уста, за да спречите голтање на воздух.
Препорачливо е шишето да го држите под агол од 45 степени, но и почесто да го подигате бебето да подригне по хранењето. Проверете и дали отворот на шишето е со доволна големина – ако е преголем, бебето можеби пребрзо јаде, а ако е ма, можно е премногу да “влече“ за да испие млеко, а со тоа вовлекува и воздух.
Но, без разлика што ги превземате сите мерки на внимание, понекогаш бебињата сеедно почнуваат да икаат. Во тој случај, најдобро е бебето да го лулате, да го држите во исправена положба и благо да го масирате со рака по грбот.
Ако бебето со часови ика, или ви се чини вознемирено и пречесто ика, поразговарајте со педијатар.
