Со доаѓањето на летото дојдоа и комарците, чии досадни каснувања, оваа година носат дополнителен страв и од ширење на коронавирусот. Дали комарците можат да го шират коронавирусот? Ви ги пренесуваме официјалните ставови на Светската здравствена организација и Американскиот центар за контрола и превенција на болести (CDC), како и резултатите од последното италијанско истражување.
Светска здравствена организација:
Нема информации, ниту докази дека новиот коронавирус може да се пренесе од комарците
„До денес нема информации, ниту докази кои укажуваат дека новиот коронавирус може да се пренесе од комарците. Новиот коронавирус е респираторен вирус кој се шири првенствено преку капки создадени кога заразеното лице кашла или кива, или преку капки плунка или капки од носот. За да се заштитите, почесто мијте ги рацете со сапун и вода или со средство за дезинфекција на база на алкохол. Исто така, избегнувајте близок контакт со секој што кашла и кива“.
Американски центар за контрола и превенција на болести (CDC)
Главниот начин на ширење на COVID-19 е од личност до личност
„До овој момент CDC нема податоци што укажуваат дека овој нов коронавирус или други слични коронавируси се шират од комарци или крлежи. Главниот начин на ширење на COVID-19 е од човек на човек.“
Комарците не го пренесуваат коронавирусот, открива италијанската студија
Новата научна студија на италијанскиот национален здравствен институт ISS покажа дека комарците не се во состојба да го пренесат коронавирусот на луѓето, се вели во изјавата на институтот, пренесуваат AFP/The Local. Студијата, спроведена во соработка со IZSV, откри дека ниту тигрестиот комарец ниту обичниот комарец не може да пренесе SARS-CoV-2.
„Истражувањето покажа дека вирусот, даден на комарец преку оброк на заразена крв, не беше во можност да се реплицира“, се вели во соопштението на ISS, кој ја отфрла можноста за пренесување на COVID-19 преку каснувањe од комарeц.
Како и да е, ISS ги советува луѓето да преземат мерки на претпазливост против комарците, особено за време на најголемата активност на инсектите пред изгрејсонце и зајдисонце. Препораките вклучуваат:
- Користете репелент;
- Носете кошули со долги ракави и долги панталони;
- Спијте во простории со клима уред каде што е можно и држете ги прозорците затворени;
- Користете мрежи за комарци.
