„Повеќе од седум децении се занимавам со медицина и неврологија. Со оглед на мојата возраст (101), често ме прашуваат како го одржувам мојот ум остар“, вели д-р Хауард Такер, невролог од Кливленд, кој ја носи титулата „Најстар активен лекар“ според Гинисовата книга на рекорди.
Како што старееме, нашите способности за ментална обработка може да се променат. Некои делови од мозокот може да се намалат, комуникацијата помеѓу невроните може да стане помалку ефикасна, а протокот на крв исто така може да се намали. Меѓутоа, за да напредува, на нашиот ум му треба постојана активност, а одредени активности можат да го одржат умот остар дури и додека старееме.
„Мојата работа бара редовно да прегледувам многу медицински теми и да размислувам за проблемите. Следењето на најновите достигнувања во областа на неврологијата го одржува мојот мозок активен“, вели д-р Такер
„Постои еден принцип до кој се придржувам и кој може секој да го примени: Одржувајте го умот „ангажиран“ преку работни, социјални и забавни активности“, објаснува д-р Хауард Такер. „Јас користам три дневни ритуали за да го поттикнам здравјето на мојот мозок“, додава тој, а пренесува „Тајмс оф Индија“.
Како да го задржите вашиот ум остар?
Истражувањата покажуваат поврзаност помеѓу пензионирањето и зголемениот когнитивен пад. Затоа доктор Такер и неговата сопруга и понатаму активно работат. „Мојата сопруга Сара, со која сум во брак 66 години, исто така на 89 години сè уште се занимава со психотерапија и психијатрија“, открива тој.
„Мојата работа бара редовно да прегледувам многу медицински теми и да размислувам за проблемите. Следењето на најновите достигнувања во областа на неврологијата го одржува мојот мозок активен“, додава тој.
Покрај работата, за стимулирање на умот придонесуваат и други активности. Волонтирањето, занимавањето со хоби и учењето нови вештини го одржуваат умот на д-р Такер ментално ангажиран. „На пример, во раните шеесетти се запишав на правниот факултет, на предавањата одев ноќе, по мојот полн работен ден во медицината. Го положив испитот за адвокат во државата Охајо на 67 години“, открива тој.
Според истражувањата, јаките друштвени односи можат да помогнат во зачувување на меморијата и когнитивните функции.
„За жал, во мои години починати се многу од моите најблиски пријатели, членови на семејството и колеги. Сепак, среќен сум што преку мојата работа создадов врски со помлади колеги“, истакнува тој. „Сара и јас, исто така, редовно вечераме со луѓе од нашата заедница, што ни овозможува да се дружиме и да ги одржуваме социјалните врски“, додаде тој.
Најмалку два пати неделно вечераат со ќерката и зетот и со синот и неговата сопруга. Тие исто така сакаат да истражуваат нови ресторани со своите пријатели и колеги.
Но, освен општествените активности, тука е и радоста на читањето поради самото читање.
„Кога не ги проучувам најновите достигнувања и третмани во неврологијата, сакам да читам биографии и детективски приказни“, вели д-р Такер. „За целосно да се нурнете во добра книга, без разлика дали е фикција или реалност, потребно е мозокот да обработи многу нови информации. Верувам дека ова е клучно за одржување на умот остар“, додаде тој.
