ПИШУВА:
Катерина Шекеровска-Димовска
katerina@pedijatar.mk
Здружението на неонатолози на РМ во изминатите два дена ги отвори вратите за сите специјалисти педијатри-неонатолози, кои во голем број присуствуваа на Симпозиумот „Неонатолошки денови – Јубилеен собир на неонатолози на РМ“, кој се одржа на 19 и 20 октомври 2023 г. во хотелот „Хилтон“ во Скопје.
Огромната посетеност, учествата во дискусии и размената на искуства, несомнено покажаа дека стручната фела е гладна за вакви настани, на кои домашните неонатолози имаат можност да ги споделат своите искуства, но истовремено и да ги дознаат новините во неонатологијата. На тема „Неонатолошки денови“, непосредно по завршувањето на Симпозиумот разговаравме со проф. д-р Силвана Наунова-Тимовска, претседател на Здружението на неонатолози на РМ.
Неонатолошките денови во организација на Здружението на неонатолози на Македонија минаа во прекрасна атмосфера во хотелот „Хилтон“ во Скопје. Како Вие го доживеавте самиот настан и кои се Вашите првични впечатоци?
Проф. д-р Наунова-Тимовска: Масовна посетеност, презентација на новините во неонатологијата, споделување на досегашните искуства, релаксирана дружба по завршување на сесиите… Презадоволна сум од пријатната атмосфера којашто владееше, од заинтересираноста на сите присутни да се вклучат во дискусиите, од заклучоците кои излегоа како препораки за она што треба да се направи понатаму потпомогнато од самото Здружение. Неонатологијата бара мултидисциплинарен пристап и за да може да се помогне на најмалите мора да се вклучат сите специјалности. Имаме потреба да работиме сите заедно, тимски.
Ова беше голем настан – 30 години е навистина бројка за респект и особено ни е драго што имавме можност да им се заблагодариме и да бидеме во друштво на основоположниците на оваа специјалност и сите кои се заслужни за развојот и успехот на неонатологијата во Македонија. Им оддадовме почит, сакавме да покажеме дека историјата не почнува само од нас, а пред нас е голем предизвик да го продолжиме сето она што ни го оставиле тие основоположници
Опфативте повеќе теми во неколку сесии на кои се дискутираше за респираторни проблеми кај новороденчињата, грижа за новородено, исхрана, вакцини, неонатални инфекции и скрининзи кај новородените. Кој е генерално заклучокот по завршувањето на јубилејниот собир на неонатолози на РМ?
Проф. д-р Наунова-Тимовска: Мора да признам дека имавме навистина мал период за да опфатиме се. Се одлучивме за некои теми коишто се најактуелни и најкритички за самите деца, не можеше се да се опфати, но се надевам дека во најскоро време, една по една ситуациите ќе се решаваат со отворање на нови секции.
Настанот „Неонатолошки денови“ мина во знакот на 30-годишниот јубилеј на Неонатолошкото здружение на Македонија. Од неодамна Вие сте на чело на ова Здружение, какви се Вашите планови како прв човек на неонатолозите во земјава во наредниот период?
Проф. д-р Наунова-Тимовска: Ова беше голем настан – 30 години е навистина бројка за респект и особено ни е драго што имавме можност да им се заблагодариме и да бидеме во друштво на основоположниците на оваа специјалност и сите кои се заслужни за развојот и успехот на неонатологијата во Македонија. Им оддадовме почит, сакавме да покажеме дека историјата не почнува само од нас, а пред нас е голем предизвик да го продолжиме сето она што ни го оставиле тие основоположници. Без минато нема иднина.
Токму овој јубилеј, ова што го доживеав ми даде ветар во грб да можам заеднички со сите неонатолози да ги решаваме проблемите пред нас и уште повеќе да одиме напред за да ги оправдаме очекувањата на нашите учители и ние да оставиме некој белег во самата неонатологија. Медицината брзо се развива, има многу нови методи, мораме и ние да ги следиме.
Најмалите го заслужуваат најдоброто за почеток во своите животни приказни, па затоа обединети да им ја дадеме нашата поддршка. Да продолжиме со меѓусебната соработка. После овој настан мора да седнеме, да разговараме и да почнеме чекор по чекор да ги исполнуваме задолженијата кои произлегоа од него, да ги спроведеме во пракса
Токму на последниот Конгрес на Европски неонатални и перинатални здруженија на кој присуствував имаше таква иницијатива – да се унифицираат знаењата на неонатолозите на ниво на Европа. Идејата е одлична, но истовремено и голем предизвик. Зависи лично од нас, не е само материјалното во однос на набавката на опрема, туку зависи и од желбата да научиме и да се пуштиме. Видов дека кај овие генерации има желба, сакаат да направат нешто и тоа ме радува, се надевам дека ќе зборуваме понатаму за поголеми успеси.
Она што можеше да се забележи на самиот Симпозиум е дека најголемиот дел од неонатолозите во земјава се жени. Зошто неонатологијата како област е попривлечна за женскиот пол?
Проф. д-р Наунова-Тимовска: Живееме во време на пазарна економија, можеби мажите сакаат повеќе динамика, иако динамика има и во интензивното работење, па навистина не знам каде се… И во родилна сала, и во неонатолошките одделенија има многу адреналин и е голем предизвик бидејќи новороденчињата не знаат да кажат што им е. Можеби и мајчинството кај жените го прави своето. Мажите се плашат од новороденчиња. Еве и дома на пример, татковците се вклучуваат во развојот на детето кога ќе биде поголемо. Кога е новороденче се плашат, па дури и да е сопругот доктор што не е педијатар.
Уште еднаш честитки за успешно организираниот Симпозиум, дали би додале уште нешто на крајот?
Проф. д-р Наунова-Тимовска: Најмалите го заслужуваат најдоброто за почеток во своите животни приказни, па затоа обединети да им ја дадеме нашата поддршка. Да продолжиме со меѓусебната соработка. После овој настан мора да седнеме, да разговараме и да почнеме чекор по чекор да ги исполнуваме задолженијата кои произлегоа од него, да ги спроведеме во пракса. Сите заклучоци кои излегоа, да се имплементираат.
