♦♦♦♦♦♦♦
Тестовите направени на хрчаци покажале дека употребата на заштитни маски значително го намалува ширењето на коронавирусот, објавија научниците од Универзитетот во Хонг Конг.
Станува збор за една од првите студии кои испитуваат дали носењето маски може да ги спречи носителите на коронавирусот, без оглед дали имаат или немаат симптоми, да ги заразат другите луѓе.
Предводени од професорот Јуен Квок-јунг, признат експерт за коронавирус, научниците поставиле кафези со претходно заразени хрчаци во близина на кафезите на здрави хрчаци.
Хируршките маски биле ставени помеѓу двата кафези со проток на воздух од заразените животни кон здравите. Резултатите покажале дека преносот на вирусот бил намален за повеќе од 60 проценти кога помеѓу кафезите биле поставени маски. Две третини од здравите хрчаци се заразиле во рок од една недела по отстранувањето на маските.
Стапката на инфекција паднала на околу 15 % кога маските биле поставени на кафезот на заразените животни и на 35 % кога биле ставени на кафезот на здравите животни, пренесува „Хина“.
