Родителите играат клучна улога во обликувањето на емоционалното и ментално здравје на нивните деца. Иако повеќето родители го сакаат најдоброто за своите деца, начинот на кој тие комуницираат и споделуваат информации пред нив може да има долгорочни последици. Експертите и истражувањата предупредуваат за важноста да се избегнуваат одредени теми бидејќи таквите разговори може да предизвикаат вознемиреност, несигурност и негативно однесување кај децата. Значи, еве кои теми треба да ги изоставиме од разговорот пред децата.
- Финансиски проблеми
Родителите треба да избегнуваат да разговараат за финансиските проблеми пред своите деца, бидејќи тоа може да предизвика чувство на несигурност и вознемиреност. Студијата од 2017 година, која ги следела биолошките реакции на студентите на стресни видеа, покажала дека стресот може да биде „заразен“. Дополнително, една студија го поврзала финансискиот стрес на родителите со проблематичното однесување кај адолесцентите, поради што родителите треба да внимаваат нивната сопствена грижа негативно да не влијае на нивните деца.
- Критикување на туѓ изглед
Треба да се избегнува коментирање на изгледот на други луѓе пред децата бидејќи тоа може да ги научи да ги судат другите врз основа на надворешните карактеристики и да ја загрози нивната самодоверба. Едно истражување покажало дека дури и „позитивните“ коментари за тежината и обликот на телото може да имаат негативен ефект врз децата. Спротивно на тоа, родителската поддршка и позитивниот разговор за телото помагаат да се развие здрава самодоверба.
- Конфликти во врска со партнерот
Расправиите и конфликтите меѓу родителите не треба да се случуваат пред децата, бидејќи тоа го поткопува нивното чувство на емоционална сигурност. Според едно истражување, дури и малите конфликти меѓу родителите можат да влијаат на способноста на детето да ги процесира емоциите, особено кај децата кои се срамежливи. Одржувањето на мирна средина дома е од суштинско значење за чувството на стабилност кај децата.
- Семејни несогласувања
Дискусиите за семејните несогласувања треба да се избегнуваат пред децата бидејќи тие можат да предизвикаат поделена лојалност или стрес. „Меѓународната енциклопедија на социјални и бихејвиорални науки“ посочува дека родителските ставови силно влијаат на децата, вклучувајќи ја нивната мотивација и однесување. Непромислените коментари за членовите на семејството можат да создадат предрасуди кај децата и негативно да ги обликуваат нивните односи со другите.
Секоја од овие ситуации нагласува колку е важно родителите внимателно да ги изберат зборовите и темите што ги споделуваат пред своите деца, со цел да го поддржат нивното емоционално и ментално здравје.
