Единаесетгодишниот застапник за деца со попреченост од Македонија, Јане Велковски, ќе му се придружи на УНИЦЕФ на глобалниот самит во Обединетите нации во Њујорк, по повод овогодишниот Светски ден на детето (20 ноември), каде деца и млади ќе побараат да се преземе акција за да се заштитат и промовираат правата на децата.
Самитот на УНИЦЕФ е дел од прославата за одбележување на Светскиот ден на детето кој се поклопува со 30 годишнината од усвојувањето на Конвенцијата за правата на детето
Јане веќе пристигна во Њујорк и се подготвува за својот говор. „Навистина сум многу возбуден затоа што ова е огромен настан. Но истовремено сум многу среќен затоа што ќе можам да му кажам на целиот свет дека сите се еднакви и дека луѓето со попреченост може да ги прават истите работи како и сите други. И дури и да не може да ги прават сите работи, тоа не значи дека не треба да уживаат во животот,“ вели Јане Велковски.
Самитот на УНИЦЕФ е дел од прославата за одбележување на Светскиот ден на детето кој се поклопува со 30 годишнината од усвојувањето на Конвенцијата за правата на детето, најшироко ратификуваната спогодба за човекови права во историјата, се вели во соопштението на УНИЦЕФ.
Велковски ќе учествува во интерактивниот дел во кој ќе бидат претставени деца застапници, ќе има креативни елементи, музички настапи и учество на амбасадори на добра волја. Тој ќе зборува заедно со други четири деца за време на панел дискусијата насловена како „Да не изостане ниедно дете: за секое дете, сите права“.
„Јане е инспирација за сите нас и пример што може да постигнат децата ако им се даде фер шанса“, вели Патриција ди Џовани, претставник на УНИЦЕФ. „Многу сме горди што токму тој ќе ја сподели својата порака со светските лидери. Тој ни покажува дека, како и секое дете, децата со попреченост со себе носат потенцијал за среќен, исполнет живот, витално учество во заедницата и давање свој придонес за да изградиме инклузивни и одржливи општества за сите.“
Заедно со Владата и во партнерство со Делегацијата на Европската унија, УНИЦЕФ во земјава организира низа активности за да ја одбележи 30 годишнината од усвојувањето на Конвенцијата за правата на детето. Училиштата низ целата земја се вклучени во активностите околу „Најголемата лекција на светот“ и ја пишуваат „Иднината на детството“. Над 1300 деца испратиле свои креативни дела кои ќе бидат дел од настанот на високо ниво во Владата „За децата, од децата“.
