Новороденчињата и доенчињата, а особено недоносените, претставуваат група со посебен ризик за појава на кандидијаза, бидејќи за нив е карактеристична недоволната зрелост на одбранбените механизми. Уште при раѓањето доаѓа до колонизација (населување) на кожата и на слузницата на устата и на цревата со кандида при поминување низ породилните патишта на мајката од вагиналната слузница, бидејќи таа е присутна во нормалната флора кај голем процент од бремените жени.
Кај бебето на слузокожата на устата и јазикот може да се појави соор, габична инфекција која се манифестира во вид на бели наслаги на кандида. Со оглед дека под нив се кријат ранички, бебето кое има соор често одбива храна и отежнато јаде.
За да му помогнете на бебето, потребно е редовно да спроведувате посебна хигиена на устата, за што ви е потребно една газа и сода бикарбона.
- Пред оброкот на бебето потребно е добро да ги измиете рацете и на показалецот да намотате чиста газа која претходно сте ја натопиле со раствор со сода бикарбона (еден децилитар вода провријте ја и оладете ја, па размешајте една лажичка сода бикарбона). Потоа со прстот внимателно чистете ги наслагите од јазикот и непцата.
- Наслагите може да ги чистете и така што газата ќе ја натопите во провриена и оладена вода, па потоа да натопите во сода бикарбона.
- При упорни инфекции, треба да се консултирате со вашиот педијатар кој ќе ви препорача соодветен лек за третман на состојбата.
Исто така, пожелно е со истиот раствор да ги бришете и брадавиците пред секој подој. Оваа постапка се повторува се додека на јазикот има бели наслаги.
