Светот денес не е розов и исполнет со еднорози и виножита, дури ни кога станува збор за мали деца. Дотолку повеќе, денес тие се изложени на предизвици и тешки моменти повеќе од кога било и тоа уште од мали нозе. Поради ова, понекогаш е тешко дури и за најмалите да гледаат позитивно на работите и да се чувствуваат вистински среќни.
Меѓутоа, како родители можеме да им помогнеме на нашите деца со тоа што ќе ги подготвиме нивните умови и мисли да се фокусираат на среќата. Всушност, можеме да им помогнеме на нашите деца да го видат позитивното во речиси секоја ситуација и да им ги дадеме потребните алатки за справување со негативноста на неколку посебни начини.
Пофалете ги секогаш кога е можно
Според психолозите, среќата и самодовербата се две тесно поврзани чувства. Затоа е важно родителите да ја негуваат самодовербата на своите деца доколку сакаат да ги насочат нивните мисли на среќа и оптимизам. Еден од начините да го направите ова се пофалбите. Но, не било какови.
Наместо да го пофалите детето за конкретен успех, победа или резултат, насочете се на пофалување на неговата работна етика, самоконтрола, убави гестови и некои други однесувања кои детето спонтано ги покажува во својата околина.
На пример, немојте само да го фалите изгледот на детето: „Денес изгледаш многу слатко!“. Наместо тоа, попрво кажете: „Денес изгледаш одлично и многу сум горд што сам си ја исчешла косата“. На детето многу ќе му значи тоа што сте го пофалиле за нешто што се сетило да го направи и неговата самодоверба вртоглаво ќе порасне.
Учете го на отпорност
За жал, нема да бидете тука за да ја решите секоја ситуација во животот на вашето дете, ниту пак секоја ситуација ќе биде решена во негова корист. За детето да не се предаде на негативноста, потребно е да се изгради неговата издржливост. Како да се постигне ова?
Децата дефинитивно треба да видат дека сте како модел на издржливост со надминување на вашите сопствени предизвици, но им треба и простор сами да ги решаваат проблемите. Во многу случаи сакаме да им помогнеме на нашите деца кога ќе се најдат во неволја – но ова е само краткорочно решение.
Наместо тоа, оставете ги сами да се справат со некоја непријатност или тешка задача, а доколку побараат помош, дајте им поддршка, идеја, појаснување, но не и целосно решение.
Доделете им одговорности
Психолозите велат дека работните ангажмани ја поттикнуваат самодовербата и среќата на децата бидејќи им помагаат да се соочат со предизвиците и да изградат работна етика и чувство за постигнување. Затоа, не штедете ги од работа – задачите во рака веќе од мали нозе. Се разбира, соодветно за нивната возраст.
Одговорноста исто така функционира на сличен начин, децата се чувствуваат важни и корисни кога ја преземаат и затоа е важно да им се дозволи да го направат тоа. Без разлика дали се работи за расправија или неуспех, важно е децата да научат како функционира одговорноста.
Научете ги на благодарност
Звучи изветвено, но учењето на децата да ги ценат малите нешта е корисно и добредојдено. Со редовно изразување благодарност и учење на вашите деца да го прават истото, на крајот можете да им помогнете да се фокусираат на среќата. Не мора да биде нешто многу „умно“ или тешко. Секојдневно прашувајте ги децата што е најдоброто нешто што им се случило тој ден, што им било највкусно да јадат, на што најмногу се радуваат за наредната недела…
Сето ова звучи многу основно, но со тоа што ги учиме децата на позитивност, поттикнуваме начин на размислување кој бара среќа во сè пред несреќа, убаво пред грдо.
