Летото порано значеше безгрижни денови на плажа, прошетки покрај вода или уживање на сонце со освежителен пијалак в рака. Но сега, како новопечена мајка, вашите приоритети се променети, а најважна ви е безбедноста и удобноста на вашето бебе. Наместо прашањето „каде да одиме денес?“, сè почесто си го поставувате прашањето: „Дали е безбедно да го изнесам бебето надвор кога е толку жешко?“
Навистина е предизвик да избалансира желбата за свеж воздух и дневна светлина со потребата да се заштити бебешкиот организам од жештината, особено кога температурите надвор се високи. Дали да останете во затворен, климатизиран простор или има безбеден начин да поминете време надвор со бебето?
Во продолжение прочитајте што велат педијатрите и кои се најважните совети за да го заштитите вашето бебе од летните жештини.
Кога му е премногу жешко на бебето, тоа станува многу раздразливо и иритирано или сосема безволно, а може да одбива и храна и течности. Доколку забележите знаци како поспаност, повраќање, висока телесна температура – итно побарајте лекарска помош
Кога надворешната температура ќе надмине 29 степени, на телото му треба повеќе енергија за да се разлади – особено на бебешкото тело. Д-р Џен Монтаги, шефица на педијатриска болница во Њујорк, вели дека треба да се избегнува најтоплиот дел од денот. „Не е во ред со новороденче или со бебе да се биде на отворено кога е многу жешко. Бебињата не можат да се потат – што инаку е начин на кој телото се разладува, па затоа многу полесно, во споредба со постарите деца или возрасните, можат да се прегреат. Исто така, треба да се има предвид дека бебињата многу побрзо можат да дехидрираат.“
Секако дека не треба цело време да останете во затворен простор, но излегувајте со малите бебиња надвор со особена претпазливост и тоа во раните утрински часови и приквечер.
„Имајте наум дека на бебињата брзо им станува прежешко, па затоа обрнете внимание во кое време од денот и колку долго сте надвор“, предупредува педијатарката д-р Моли Бродер.
Секако дека не треба цело време да останете во затворен простор, но излегувајте со малите бебиња надвор со особена претпазливост и тоа во раните утрински часови и приквечер
Кога сте надвор со бебето, внимателно набљудувајте дали покажува знаци на топлотна исцрпеност.
„Кога му е премногу жешко на бебето, тоа станува многу раздразливо и иритирано или сосема безволно, а може да одбива и храна и течности. Доколку забележите знаци како поспаност, повраќање, висока телесна температура — итно побарајте лекарска помош“, вели д-р Монтаги.
Еве неколку совети како да спречите прегревање на бебето за време на жешките летни денови:
- Барајте сенка: Сенката е идеално место ако сакате да бидете надвор. Никогаш не изложувајте го бебето директно на силно сонце.
- Не облекувајте го премногу: Лесна облека во светли бои што не е тесна ќе помогне да му биде посвежо на бебето. Памукот е најдобриот материјал, а капче што го штити лицето и вратот е задолжително.
- Доите и нудете течности почесто: „За бебињата под шест месеци, мајчиното млеко или адаптираното млеко се најдобар избор, но во жешките денови не заборавајте да им понудите и вода“, вели д-р Монтаги.
- Не покривајте ги количките или носилките: Најдобро е да користите чадорче. „Дури и тенко ќебенце може да ја зголеми температурата во количката. Затоа важно е да има струење на воздух“, советува д-р Бродер.
- Бидете внимателни кога го носите бебето во кенгур или слинг марама: „Ако на мама или тато им е премногу жешко, нивната телесна температура се пренесува на бебето“, вели д-р Монтаги и советува и родителите и детето да носат само еден слој лесна облека. „Можете да му помогнете на бебето така што повремено ќе му ги навлажните рачињата и ножињата со малку вода или ќе ги избришете со влажна крпа.“ Исто така, кенгур направен од потенок и посветол материјал е подобар избор за летните денови отколку оној кој е направен од подебел и потемен материјал.
- Ако бебето добие осип од сонцето, оставете ја кожата да „дише“: Избришете ја кожата со чиста вода и оставете да се исуши. Избегнувајте креми и лосиони кај многу мали бебиња.
