Децата сакаат играчки, тоа е сосема нормално, па си играат со нив, ги носат низ дома, спијат со нив, понекогаш и ги џвакаат, се лигават по нив… Поради сето ова со текот на времето тие стануваат валкани и потребно е убаво да се исперат и дезинфицираат – дури и ако не се видливо валкани, може да имаат разни бактерии, алергени, мувла…
Ви ги откриваме најдобрите начини за чистење и дезинфекција на детските играчки од различни материјали.
Чистење на пластични и играчки за капење
Цврстите, пластични играчки лесно може да се исперат и во машина за миење садови – наредете ги поголемите како и обично, а помалите ставете ги во некоја кеса. Измијте ги како и обично, а потоа исушете ги со крпа.
Пластичните играчки можете да ги дезинфицирате и со влажна крпа и трипроцентен раствор на хидроген. После тоа, кога ќе се исушат на воздух, исплакнете ги играчките под млаз топла вода и оставете ги повторно да се исушат, за да бидете сигурни дека на нив нема остатоци од хидрогенот.
Имајте на ум дека играчките за капење се особено проблематични бидејќи имаат отвор каде што влегува водата, а во нив лесно може да се формира мувла. Затоа, исцедете што е можно повеќе вода по секоја употреба и оставете ги играчките да се исушат. Ако забележите дека се формира мувла внатре, веднаш фрлете ги.
Чистење на плишани играчки
Обично е безбедно овие играчки да ги исперете во машината за перење, но секогаш внимавајте на етикетата за одржување. Секако, секогаш можете да ги ставите во навлака за перница која ќе ја затворите за да ги заштитите играчките. Перете ги на „понежна“ програма, со млака вода и побавен циклус на центрифугирање.
Ако ги сушите играчките во машина, изберете програма со не толку висока температура, а ако ги исушите на сонце, ставете ги на топло и изберете период кога има неколку топли денови, бидејќи е тешко за поголеми играчки да се исушат во еден ден.
Исто така, внимавајте кадифените играчки никогаш да не ги миете со пластичната кутија во која одат батериите, бидејќи може да се оштети од водата.
Кога станува збор за кадифени играчки кои не можат да се стават во машината, исчистете ги со влажна крпа натопена со мешавина од вода и детергент за садови или прашок за перење. Оставете да се исушат на воздух или забрзајте го сушењето со фен.
Ако треба само да ги дезинфицирате, без миење, можете да ги елиминирате бактериите и другите алергени така што полека ќе ја поминете играчката со пегла на пареа (по можност за вертикално пеглање), а потоа темелно ќе ја исчистите играчката со правосмукалка.
Чистење на дрвени играчки
Дрвените играчки се одлични бидејќи се направени од природен материјал, но кога станува збор за чистење, знајте дека не смеете да ги потопувате во вода бидејќи може да ја променат формата или да ја изгубат бојата.
За чистење на дрвените играчки, доволно е да ги избришете со крпа натопена со топла вода со малку благ сапун, а потоа да ги исплакнете со влажен сунѓер.
Кога станува збор за дезинфекција, користете бел или јаболков оцет измешан со вода, оставете ги да се исушат на воздух или избришете ги играчките со сува крпа.
Имајте предвид дека не е безбедно да користите производи за чистење мебел од дрво или марамчиња за дезинфекција бидејќи тие можат да бидат токсични за детето.
Родителите кои сакаат да ги научат своите деца за вредноста на парите треба да ги следат овие совети
