Канада го изгуби статусот на земја во која малите сипаници или морбилите се искоренети по речиси три децении, поради неуспешното спречување на епидемијата што трае веќе една година, информираше Државната агенција за јавно здравје.
Земјата регистрирала повеќе од 5.000 случаи на мали сипаници во девет од нејзините 10 провинции и една северна територија. „Иако преносот на оваа заразна болест неодамна се забави, епидемијата трае повеќе од 12 месеци, првенствено во недоволно вакцинирани заедници“, соопшти агенцијата.
Искоренувањето на морбилите може да се дефинира како отсуство на ендемски пренос на мали сипаници 12 месеци или повеќе во дефинирана географска област, што мора да биде придружено со висококвалитетен и функционален систем за надзор и откривање на сите нови случаи.
„PAHO ја информираше Агенцијата за јавно здравје на Канада дека Канада повеќе нема статус на земја во која се искоренети морбилите“, се вели во соопштението, додавајќи дека агенцијата ќе се фокусира на подобрување на покриеноста со вакцинација во покраините, зајакнување на споделувањето податоци и обезбедување висококвалитетен и функционален систем за надзор за откривање и следење на сите нови случаи.
Здравствените експерти велат дека падот на стапките на вакцинација во некои делови од земјата е знак за повторно појавување на голем број болести што може да се спречат со вакцинација.
Но, од пандемијата со коронавирусот, населението станува сè поскептично и недоверливо кон вакцините.
Канцеларијата на министерка за здравство Марџори Мишел одби да ја коментира информацијата.
