Можеби едвај чекате вашето дете да се откаже од спиењето преку ден, а можеби сте нервозни затоа што тоа значи дека ќе изгубите драгоцено време за себе. Како и да е, можеби се прашувате и кога воопшто децата престануваат да преспиваат преку ден.
Педијатарот д-р Крупа Плејфорт за „Тудеј“ вели дека спиењето е клучно за сите, особено за децата кои растат и се развиваат.
„Се повеќе истражувања потврдуваат дека висококвалитетниот, конзистентен сон со соодветно времетраење му помага на телото да функционира. Имаме дури и студии кои ни покажуваат дека дневните дремки можат да им помогнат на децата од предучилишна возраст да научат и да запомнат информации“, објасни таа, додавајќи дека спиењето е неопходно за раст, развој на мозокот, регулирање на расположението, закрепнување и имунолошка функција.
Спиењето е неопходно за раст, развој на мозокот, регулирање на расположението, закрепнување и имунолошка функција
Распоредот за дневно преспивање варира во зависност од возраста.
„Помеѓу првата и втората година, повеќето деца преминуваат од два дневни одмори на еден. На децата на таа возраст им требаат помеѓу 11 и 14 часа сон во рок од 24 часа, што вклучува и дремки преку денот“, вели педијатарот.
„Исто така, нормално е да се забележи промена во шемите на спиење околу 2. и 3. година, но на повеќето деца под 3 години сè уште им е потребна попладневна дремка“, продолжува таа.
Според Плејфорт, „децата на возраст помеѓу 3 и 4 години почнуваат да кокетираат со престанувањето на спиењето, но и понатаму им е потребен дневен одмор за да им помогне полесно да го поминат остатокот од денот“.
„Ако вашето тригодишно дете сè уште спие во текот на денот, а спие добро навечер, нема потреба да му го укинувате дневниот одмор. Запомнете дека на децата на возраст од 3 до 5 години обично им требаат помеѓу 10 и 13 часа сон на ден“ забележува таа.
Според анкетите, приближно 60 отсто од четиригодишните деца имаат попладневен одмор, додека само мал дел од петгодишните спијат преку ден.
