Родителите знаат дека кога бебето ќе почне да си ги триe очите, време е за спиење. Но, дали некогаш сте се запрашале зошто всушност го прават тоа? Што ги поттикнува на таквото однесување и дали тоа има некаква физиолошка смисла? Науката ни нуди некои интересни одговори.
„Луѓето генерално ги тријат очите кога се уморни, а се верува дека тоа е поврзано со чувството на непријатност кое се јавува кога очните мускули се изморени,“ вели д-р Ребека Дудовиц, професорка по педијатрија на Медицинскиот факултет „Дејвид Гефен“ при UCLA, за „Live Science“.
Исто како што рамената се вкочануваат по долго седење пред компјутер, така и очните мускули се заморуваат – особено кај бебињата кои со денови внимателно набљудуваат сè околу себе.
Дополнително, бебињата трепкаат многу поретко од возрасните – само неколку пати во минута – што може да доведе до сушење на очите.
„Солзите не се само солена вода“, објаснува офталмологот д-р Роберт В. Арнолд од Детскиот центар за очи и страбизам на Алјаска. „Здравата солза има три слоја: слузен слој до површината на окото, потоа слој со солена вода, и конечно масен слој од жлездите на рабовите на капаците кој спречува испарување“.
Исто како што рамената се вкочануваат по долго седење пред компјутер, така и очните мускули се заморуваат – особено кај бебињата кои со денови внимателно набљудуваат сè околу себе
Кога не трепкаме доволно, таа слоевита заштита може да се наруши и да остави суви точки на површината на рожницата. Триењето на очите може да биде сигнал до телото дека треба да трепнеме и повторно да ја воспоставиме таа заштита – нешто како воздишка, но за очите.
Сепак, стручњаците предупредуваат дека претераното триење на очите може да има и негативни последици, вклучувајќи оштетување на рожницата или зголемен ризик од проблеми со видот. Понекогаш се спомнува и теорија дека триењето стимулира одредени нерви и го намалува крвниот притисок, но д-р Арнолд смета дека таа теорија не држи вода, особено затоа што забавената работа на срцето кај децата може да биде опасна.
На крајот, најверојатната причина зошто бебињата си ги тријат очите е прилично едноставна: уморни се, очите им се суви и подготвени се за спиење.
