Покрај видот на чај, за неговиот квалитет, но и неговите придобивки да бидат најизразени, многу е важно во која форма се купува чајот, но и како и каде се чува, а и како се послужува.
Зошто е добар чајот?
Покрај тоа што различни билки имаат одредна придобивка за различни системи во организмот, чаевите може да бидат здрава замена за сокови, шејкови и останати нездрави напивки. Тие може да бидат и дек од заедничка рутина што вие и вашето дете ја минувате заедно. Чаевите може да помогнат при болка во грлото, да ја смират кашлицата, но и да загреат и да хидрираат. Може да се консумираат и во разладена форма, кога освежуваат и заменуваат останатите помалку здрави пијалаци.
Како да купите вистински чај?
Ако сакате од чајот да го извлечете најдоброто тогаш препорака е да купите чај во ливчиња, а не во кесички. Овие т.н. филтер вреќички се направени од чајна прашина, а со тоа и нивниот вкус е поблаг, а придобивките помали. Содржат и адитиви за подолго да траат и да останат свежи. Кога купувате чај во ливчиња или рефус не купувајте голема количина, за чајот да ви биде свеж. Чајот чувајте го на суво и темно место, најдобро во алуминиумска кутија што убаво може да се затвори.
Кога најрано може да му дадете чај на детето?
Чаевите може да им се воведат на децата од втората недела од животот, кога прво се користат чаеви кои го регулираат варењето, надуеноста и грчевите. Тоа се обично комбинирани чаеви кои содржат камилица, коморач и анасон.
Кои чаеви не треба да им се даваат на децата?
Одредена група чаеви што се популарни меѓу возрасните содржат кофеин, што е стимуланс. Тие може да предизвикаат проблеми со спиењето, нервоза, дури и анксиозност, а кај децата може да доведат и до дехидрација и нарушен електролитен статус. Поради тоа, чаевите од фамилијата на црни, бели, зелени не се препорачуваат за деца кои се помали од 12 години. Обрнете внимание кога на детето за прв пат му давате одреден чај, бидејќи некои деца може да развијат алергија на одредена билка.
Кои чаеви се најдобри за детето?
Децата може да пијат билни чаеви, а тоа се пред се, нане, камилица, коморач, жалфија, маточина.
Откако водата ќе проврие, ставете една лажичка чај во шолја од 2 дцл. Ако забележите дека чајот е премногу ароматичен за детето, додадете уште малку вода. Оставете 5 минути, па процедете. Билните чаеви не се комбинираат со млеко, но може да им додадете малку мед или лимон, за да го подобрите вкусот. Ако додавете лимон, почекајте малку чајот да се олади. Не претерувајте во количината на чаеви. За детето до три шолји чај дневно е сосема доволно.
