Родителите обично не се оптоварени со Апгар тестот кој се прави кога ќе се роди бебето. За разлика од училипните оценки кои родителите сакаат гордно да ги поделат на социјалните мрежи, многумина сметаат дека Апгар е само едно од многубројните рутински мерења, заедно со тежината и со висината, а со кое се оценува здравјето и состојбата на детето при раѓањето.
“Апгар е клиничка проценка направена во првите минути од животот, со цел да се утврди колку добро поминал преминот од матката во надворешниот живот“, објаснува неонатологот Тери Мејџор.
Тоа е проценка колку добро новороденчето се прилагодува на светот. Високата оценка не значи дека детето долгорочно ќе биде здраво. Сепак, Апгар е многу важен за лекарите во текот на првите неколку часа од животот, оти тестот е осмислен како би им помогнал на лекарите да ја проценат вкупната физичка состојба на новороденчето и да му ја обезбедат потребната медицинска нега ако е потребна, што може да биде пресудно во првите часови од животот.
СЕ МЕРАТ ПЕТ ВРЕДНОСТИ
Овој тест се спроведува во современите болници ширум светот, а мери пет вредности: бојата на кожата, дишењето, напнатоста на мускулите, одговорот на надразба и срцевата акција. Секој показател се оценува од 0 до 2, а вкупно може да се остварат 10 бодови. Проценката се прави по првата минута, и потоа пет минути по раѓањето на бебето. Понекогаш резултатите на првиот тест може да бидат послаби. На пример, ако бебето е родено предвреме или со царски рез, понекогаш може да има пониски просечни резултати, особено на првиот тест.
Типичниот резултат на Апгар тестот е од 8 до 10. Секој резултат кој е понизок од 6, им покажува на лекарите дека новороденчето треба итна медицинска помош. Тоа може да бидат едноставни зафати како вшмукување на дишните патишта или давање кислород на активна реанимација.
