Газираните пијалаци претставуваат извор на “празни“ калории, а добро е познато дека прекумерното внесување на овие супстанции е поврзано со зголемен ризик од развој на бројни хронични болести. Освен тоа, ваквите напивки често содржат и синтетички адитиви како конзерванси и бои, за кои постојат докази дека предизвикуваат зголемена хиперактивност кај децата.
ШТО ВЕЛАТ ПРЕПОРАКИТЕ ЗА ВНЕСОТ НА ШЕЌЕРИ КАЈ ДЕЦАТА?
Научниците се согласуваат дека децата не треба да внесуваат повеќе од 10% енергија од додадени шеќери. Тоа би значело дека дете на возраст од 4 до 8 години на кое му се потребни 1.600 калории дневно не треба да консумира повеќе од 130 kcal од шеќери, односно 32 грама или 6 лажички. За споредба, само една голема чаша од популарниот газиран пијалок со темна боја содржи дури 39,2 грама или речиси 8 лажички шеќер. Новите препораки на Светската здравствена организација се уште построги и го ограничуваат внесот на шеќер на не повеќе од 5% од вкупниот внес на енергија.
Поразителен факт е дека децата денес пијат приближно 30 пати повеќе газирани пијалаци отколку во 1950 година. Студијата што ја спровело Американското здружение за болести на срцето покажало дека децата на возраст од 1 до 3 години обично консумираат 12 лажички шеќер дневно (60гр) преку разни напивки, слатки и индустриски преработени производи. Децата на возраст од 4 до 8 години внесуваат во просек по 21 лажичка шеќер дневно, а адолесцентите на возраст од 14 до 18 години консумираат 34 лажички.
Тоа укажува дека децата и адолесцентите консумираат три пати повеќе шеќер од препорачаната граница на внесување.
