Една од важните предности на доењето за мајката е потрошувачката на калории, а научниците пресметале дека добиените 11 килограми во бременоста може да се намалат за шест месеци по породувањето, и тоа исклучиво само со доење.
Одлуката дали жената, по породувањето, ќе дои или нема да дои е една од најважните. Покрај бројните предности за бебето, вклучувајќи и помал ризик од обезност и подобри когнитивни способности, доењето има неверојатни предности за мајката.
Една од важните предности на доењето за мајката е потрошувачката на калории. Женските гради почнуваат да продуцираат млеко за доење, 24 часа по породувањето. 30гр мајчино млеко содржи над 20 калории, а бебе кое се храни исклучиво само со мајчино млеко, просечно консумира 700гр млеко на ден, во текот на првите шест месеци од животот.
Тоа просечно значи дека жената која дои троши дополнителни 500 калории на ден. Таа бројка е поголема доенчето јаде повеќе или е помала ако има намален апетит.
Американското здружение за едукација во бременоста проценува дека новите мајки трошат дополнителни 425 до 700 калории на ден во процесот на доење.
Дополнителното трошење калории обично доведува до видливо и брзо губење на телесната тежина во комбинација со здрав начин на живот. Едно истражување открило дека новите мајки кои дојат губат двојно повеќе килограми во првата година по породувањето во споредба со мајките кои не дојат – 4,9 килограми во однос на 2,17 килограми. Друго истражување, во кое биле вклучени 30.000 жени, открило дека добиените 11 килограми во бременоста може да се намалат за шест месеци по породувањето само со доење.
Меѓутоа, тоа не е се што се однесува за калориите и доењето. Покрај што троши калории, доењето може да го затегне и средниот дел од вашето тело благодарение на окситоцинот, хормон кој се ослободува за време на доењето. Окситоцинот предизвикува контракции на матката и е многу корисен за време на трудовите. А, по породувањето, окситоцинот кој се ослободува за време на лактацијата помага да се намали матката до големината пред бременоста. Исто така, нови докази покажуваат дека жените кои дојат имаат помала стапка на кардиоваскуларни заболувања, гинеколошки карциноми, па дури и дијабетес во споредба со мајките кои не доеле.
