Одлуката за тоа дали жената ќе дои или не, е една од најважните кога ќе се породи. Од бројни предности за бебето, вклучувајќи помал ризик од обезност и подобри когнитивни способности, доењето има и неверојатни предности за мајката.
Една од важните предности на доењето за мајката е трошењето на калории. Женските гради всушност стануваат фабрика за млеко за време на бременоста, а производството го почнуваат 24 часа по породувањето.
30 грама мајчино млеко содржи над 20 калории, а бебе кое се храни само со мајчино млеко, просечно консумира 700 грана во текот на денот, во првите шест месеци од животот.
Тоа значи дека доилка, просечно троши 500 дополнителни калории на ден. Таа бројка е поголема ако доенчето јаде повеќе или е помала ако има намален апетит. Американското здружение за едукација во бременоста проценува дека новите мајки трошат дополнителни 425 до 700 калории на ден при процесот на доење.
Дополнителното трошење на калории обично доведува до видливо и брзо намалување на килограмите во комбинација со здрав животен стил. Едно истражување покажало дека новите мајки кои дојат, губат двојно повеќе килограми во првата година по породувањето во споредба со мајките кои не доеле – 4,9 килограми во однос на 2,17 килограми. Уште една студија во која учествувале 30.000 жени, открила дека добиените 11 килограми во бременоста може да се намалат за шест месеци по породувањето, исклучиво со доење.
Но, тоа не е се за калориите и доењето. Освен што троши калории, доењето и може да го затегне средниот дел од вашето тело, благодарение на окситоцинот – хормон кој се ослободува за време на доењето. Окситоцинот предизвикува контракции на матката, а е многу корисен при добивањето болки за породување. А, по породувањето, окситоцинот кој се ослободува за време на лактацијата, помага за намалување на матката на големина како пред бременоста. Исто така, нови докази покажуваат дека жените кои дојат имаат пониска стапка на кардиоваскуларни болести, гинеколошки карциноми, па дури и дијабетес, во споредба со мајките кои не доеле.
