Додека го очекуваме најавеното прскање против комарци, како каков-таков спас од „цицачите“ кои деновиве ни ја „испија“ крвта, од CDC и СЗО смируваат: не може да се заразите со COVID-19 од убод на комарец.
„Главниот начин на ширење на COVID-19 е од човек на човек“, смируваат од Американскиот центар за контрола и превенција на болести (CDC). „До овој момент CDC нема податоци што укажуваат дека овој нов коронавирус или други слични коронавируси се шират од комарци или крлежи“.
И Светската здравствена организација го има истиот став. „До денес нема информации, ниту докази кои укажуваат дека новиот коронавирус може да се пренесе од комарците. Новиот коронавирус е респираторен вирус кој се шири првенствено преку капки создадени кога заразеното лице кашла или кива, или преку капки плунка или капки од носот. За да се заштитите, почесто мијте ги рацете со сапун и вода или со средство за дезинфекција на база на алкохол. Исто така, избегнувајте близок контакт со секој што кашла и кива“, апелираат од СЗО.
