Честитки, станавте родител! Има толку многу работи на кои треба да обрнете внимание во развојот на вашето дете, а една од нив се малите стапала на вашето бебе. Многу е важно да научите како правилно да се грижите за нив, бидејќи вашето малечко ќе ги направи првите, а потоа уште многу чекори, ќе трча и на крајот ќе го помине целиот свој живот на нив.
Затоа, грижете се за нив во сите фази од животот на вашето дете, а ние ќе ви покажеме како. Во првите месеци, стапалата на бебето се меки и флексибилни, а коските се уште се формираат. Што треба да направите?
Одржувајте ги чисти и суви
Како што веќе напишавме, стапалата во оваа фаза се сè уште неразвиени и многу чувствителни. Ваша главна задача е да ги одржувате суви и чисти бидејќи се подложни на инфекции и иритации. Редовно одржувајте ја хигиената со миење на нозете во млака вода со благ сапун. По миењето, погрижете се добро да ги исушите стапалата, особено помеѓу прстите.
Избегнувајте премногу тесни чорапи или чевлички
Чорапи и чевли со вистинска големина се основата на негата и грижата за детските стапала. Чорапи со горен дел кој стега, како и чевли кои се премногу тесни, може да ја запрат циркулацијата, да предизвикаат непријатност, па дури и потенцијално да предизвикаат деформација на стапалата.
Затоа, изберете удобни чорапи, секогаш направени од природни материјали, исто како што би одбрале чевли што одговараат на големината на детското стапало, да се удобни, но и даваат добра поддршка, особено при првите чекори.
Дозволете босоногост
Ако му дозволите на вашето дете да игра босо, ќе му помогне за природниот развој на мускулите на стапалата, сетилниот развој и рамнотежата. Исто така, децата на тој начин ќе ја подобрат својата координација и сензорно ќе се прилагодат на сите површини со кои доаѓаат во контакт.
Обезбедете безбедна средина за оваа едноставна, но многу здрава вежба и гледајте го вашето дете како ги зајакнува стапалата секој ден.
Забележете ги абнормалностите на време
Малите стапала се чувствителни. Прегледувајте ги секој ден и внимавајте дали има знаци на иритација, осип, некакво црвенило, оток… тоа ќе ви биде јасна порака дали се е во ред или треба да се консултирате со педијатар.
Немојте да мислите дека претерувате ако ве загрижува црвенило или оток, секогаш е добро да добиете дополнителни информации, отколку да ги оставете работите на случајноста.
Внимателно сечете ги ноктите
Во оваа работа треба да бидете нежни, колку и прецизни. За да избегнете враснување на ноктите, секогаш сечете ги право, а не во полумесечина, отсекувајќи ги рабовите премногу. Сечењето премногу блиску до кожата може да доведе до болно враснати нокти, затоа оставете мала количина бел нокт да биде видлива.
