Природното бојадисување јајца одзема малку повеќе време, но е поздраво и нема да стравувате дека ќе внесете штетни материи во организмот. Оваа традиција повторно е актуелна, а со природното бојадисување ќе постигнете бои кои нема да ги најдете во маркетите.
Како јајцата да не ви пукаат?
Добар совет е порано да ги извадите јајцата од фрижидер за да се загреат на собна температура, а потоа да ги измиете, да ги ставите во ладна вода во која сте ставиле малку сол. Доколку сакате бојата да биде поизразена, ставете ги преку ноќ во солена вода, но тогаш мора да ги чувате во фрижидер.
Како природно да бојадисате јајца?
Постапката за природно боење на јајцата е иста за сите намирници. Во тенџере измешајте еден литар вода со две лажици оцет. Кога ќе зоврие, додадете ги природни бои, намалете ја температурата на најниско и оставете да врие околу половина час.
Процедете ја обоената вода и оставете ја да се излади, па дури потоа ставете ги оладените, претходно сварени јајца. Оставете да отстои минимум час или два.
Оцетот се додава како фиксатор на бојата, па ако бојадисувате со црвен кромид и зачини, додадете го, но ако боите со зеленчук и овошје немојте, бидејќи така бојата ќе стане сива или кафена.
КРОМИД
Една од најчесто користените природни бои за јајца е црвениот/виолетов кромид, но и обичниот. Неговата лушпа треба да се свари со вода и да се додаде една лажица оцет, а потоа јајцата да се стават во неа и да се остават да отстојат додека не ја добиете саканата црвена нијанса.
КАФЕ
Сварете 300мл силно кафе, а потоа додадете уште две лажици мелено кафе, како и две лажици оцет.
ЦВЕКЛО
Изрендајте 800гр свежо цвекло, додадете една лажица оцет и измешајте со вода. Ставете ги јајцата и оставете да добијат убава розова боја. Не грижете се ако првично ви изгледаат темнокафени, сепак ќе добиете нежна розова воја.
ЗЕЛКА
Сина боја може да добиете и од зелка. 600гр сечкана виолетова зелка ставете ја во жешка вода. За посветла боја оставете ги јајцата да стојат половина час, а ако сакате поинтензивна, најдобро е да ги оставите да стојат цела ноќ во фрижидер.
СПАНАЌ
Во вода се ставаат листовите спанаќ, се додава една лажица оцет и се варат со јајцата. По варењето оставете ги јајцата уште потопени во вода, додека не ја добиете саканата нијанса.
КУРКУМА
Сварете неколку лажици куркума во вода со една лажица оцет и ќе добиете убава жолта боја. Но, вака обоените јајца се чувствителни на дневна светлина, па брзо бледнеат.
Откако јајцата ќе се исушат и изладат, можете да ги премачкате со масло за јадење за да добијат сјај.
