Кроновата болест е хронично воспаление на цревниот ѕид, односно воспаление на дигестивниот тракт и може да го зафати целиот дигестивен тракт од устата до анусот. Се појавуваат различни симптоми како дигестивни проблеми, губење на тежина или болки во стомакот. Во некои случаи, оваа болест може да биде многу непријатна, да влијае на секојдневниот живот и да предизвика компликации опасни по живот. Не постои лек за Кронова болест, туку се третираат симптомите за да може лицето да живее што е можно понормално.
СИМПТОМИ
Оваа болест кај некои ќе предизвика благи симптоми, додека кај други ќе влијае на секојдневните животни активности. Симптомите може да бидат постојани или да траат неколку недели, па да се повлекуваат и така во круг. Најчесто болеста се развива со години, додека има и случаи кога болеста доаѓа ненадејно.
Симптомите на Кронова болест вклучуваат:
- Пролив
- Болки и грчеви во стомакот
- Слабост
- Крв во столицата
- Губење на килограми
- Губење на апетитот
- Покачена температура
- Болка или нелагодност околу анусот
Покрај овие симптоми, може да се појават и проблеми со бубрезите, црниот дроб или кожата. Луѓето со Кронова болест можат полесно да развијат цревни инфекции предизвикани од вируси, бактерии, паразити и габи. Овие инфекции не треба да се игнорираат, туку мора да се лекуваат навреме за да се избегнат компликации.
ШТО ПРЕДИЗВИКУВА КРОНОВА БОЛЕСТ?
Точната причина не е позната, но генетиката може да игра голема улога во добивањето. Поточно, побрзо ќе се појави кај луѓе кои во семејството имаат некој кој боледува од Кронова болест. Исто така, луѓето со ослабен имунолошки систем и луѓето кои пушат се најмногу изложени на ризик.
КРОНОВА БОЛЕСТ КАЈ ДЕЦАТА
Болеста најчесто се јавува во 20-тите и 30-тите години од животот, а може да се појави и кај деца. Децата ги имаат истите симптоми како возрасните и неопходно е да се побара помош од лекар. Кај децата симптомите се појавуваат во периоди, па можат да бидат во ремисија со години, односно без симптоми. Ако Кроновата болест кај децата не се третира, може да доведе до слаб развој на коските. Кај децата болеста се лекува со лекови кои го намалуваат воспалението, како и вежбање и урамнотежена исхрана.
