Училишната година заврши, се прават планови за летен одмор, и на родителите секако, многу им е важно децата да го искористат распустот на најдобар начин, и тоа да биде продуктивно и корисно. Сепак, клучна работа распустот да биде корисен е токму тоа да се остави дел од одморот неиспланиран, или барем со активности кои на децата ќе им пружат доволно слободно време.
Кога децата немаат испланирано време, учат сами себе да се забавуваат. Способноста сами да играат, или пак да истражуваат нешто, треба да се научи, а многу често тоа доаѓа токму од здодевноста. На децата им е потребно слободно време за да се научат да бидат мирни и среќни без влијание на околината, како и да создаваат идеи или активности од нула. Оваа способност прави огромна разлика во животот.
Неиспланираното време во друштво на други, ги учи децата на преговарање и соработка. Кога децата се заедно во испланирана активност, повеќето работи за нив веќе се направени, бидејќи улогите и правилата се веќе одредени. Способноста за работа во група, креирање и одредување на улогите е добар начин децата да се научат на вештини кои се круцијални за работното место и животниот успех. Оние кои ќе ги научат овие вештини се посреќни и поуспешни од оние кои нема да ги научат.
Доколку децата дома го имаат тоа слободно време, бидете сигурни дека тоа е целосно искористено. Ограничете им го времето што го минуваат на уредите на најмногу два часа дневно. Обезбедете им средства потребни за креативност и забавни активности, како хартија, боици, моливи и други материјали, коцки, топка, било што кое може да им послужи за активна игра. Носете ги во бибилиотека, во парк и на проштеки. Дозволете да ви помогнат во кујната. Ако им е здодевно, немојте да се трудите да им пронајдете нова активност, туку поттикнете ги да останат сами и да пронајдат интересна забава.
