Измолзувањето и одложувањето на мајчиното млеко во шишенце е добар начин да бидете сигурни дека бебето ќе ја добие својата храна, дури и кога не сте физички присутни во тој момент, велат педијатрите.
Секако, важно е млекото да го чувате на одреден начин, за да биде безбедно и детето подоцна да го пие од шишенце.
Лекарите советуваат измолзеното млеко да го ставите во стерилно шише и да го чувате во фрижидер, и таквото млеко може да се користи и во наредните пет дена. Но, ако измолзеното млеко го ставите во шишенце на собна температура, тоа е безбедно за бебето во наредните четири часа.
Експертите посочуваат дека е важно температурата на која го чувате млекото да биде помеѓу два и четири степени Целзиусови или пониска. Затоа, ако од било кои причини, сакате да оставите поголема количина млеко и подолг временски период, најдобро решение е да го чувате во замрзнувач.
“Во замрзнувач, млекото може да стои и до шест месеци. Ако тоа го правите, најдобро е на шишенцето или кесата во која сте го замрзнале да напишете датум, за прво да го користите најстарото млеко“, велат педијатрите.
