Одредени предмети во нашиот дом можат да претставуваат потенцијална опасност за безбедноста на детето без честопати да не сме свесни за тоа. На истото предупреди и медицинската сестра и мајка на три деца Ники Јуркуц, која објави листа на работи кои можат да бидат многу опасни за нашето дете и кои треба да ги отстраниме.
Жици и кабли подолги од 20 сантиметри
Како што објаснува Јуркуц во својот пост, жиците и каблите подолги од 20 сантиметри претставуваат голема опасност за детето бидејќи можат да доведат до задушување. Ова вклучува полначи за мобилни телефони или лаптопи, ремени и сите видови играчки кои имаат врвки на нив.
Работи што може да содржат вода
Медицинската сестра предупредува дека на детето му се потребни само 20 секунди да се удави и тоа во само неколку сантиметри вода. Затоа е неопходно да се обрне посебно внимание на работи како што се кадата, базенот, па дури и чиниите со вода за домашни миленици.
Предмети што имаат мали батерии
Со оглед на тоа што бројот на деца примени во Брза помош или Ургентно по голтање мали литиумски батерии, познати и како копчести батерии, се удвојува во изминатата деценија, педијатрите редовно ги предупредуваат родителите да внимаваат на играчките што ги содржат. Имено, тие предизвикуваат најголема опасност од задушување кај малите деца. Покрај играчките, тоа може да бидат клучеви од автомобил или часовници.
Жешки предмети
Предметите кои лесно и брзо се загреваат, како што се тенџериња, пегли или шолји со топла течност, претставуваат голема опасност од потенцијални изгореници кои можат да му остават на детето доживотна лузна. Токму затоа медицинската сестра Јуркуц предупредува дека децата никогаш не треба да се оставаат сами во близина на овие предмети.
Лекови
Покрај тоа што може да предизвикаат опасни по живот несакани ефекти кај децата доколку ги изедат, лековите може да доведат и до задушување, поради што секогаш треба да се држат подалеку од деца, предупредува медицинската сестра.
