Тажни вести доаѓаат од Загреб. Хрватска ја има најмладата жртва од последиците од инфекција со коронавирус. Станува збор за 11-годишно момче, кое било позитивно на COVID-19, а како причина за смртта се смета мултиоргански воспалителен синдром.
„Момчето беше позитивно на корона, почина најверојатно од мултисистемски воспалителен синдром. Дошло до прекумерна воспалителна реакција во телото, и за жал момчето починало“, изјави хрватскиот министер Вили Берош, а пренесува „24 сата“.
Момчето било итно оперирано, но се појавиле компликации за време и по операцијата
„Имаше анамнеза од неколкудневна покачена температура, главоболка и болки во стомакот. Поради сомневање за акутен проблем во стомакот, беше примен на Одделот за детска хирургија и беше извршена лабораториска и дијагностичка обработка, што укажуваше на бубрежна инсуфициенција, нарушување на коагулацијата, знаци на сепса. Беше пренесен на Одделот за интензивна нега“, објасни директорот на Клиниката за детски болести, Горан Роиќ.
„Пред воведувањето во анестезија, дојде до застој во работата на срцето. Детето беше реанимирано и по стабилизацијата операцијата беше довршена, но во постоперативниот тек детето беше зависно од респираторна и кардиоваскуларна поддршка и поради позитивниот наод за COVID-19, се посомневавме дека дошло до компликации и мултиорганско затајување“, објасни тој.
Што е мултиоргански воспалителен синдром?
Мултисистемскиот воспалителен синдром се јавува како резултат на прекумерен имунолошки одговор, најчесто се јавува кај помладата популација, кај здрави деца, кои немале никакви хронични заболувања.
Кај децате кои имале или го преболеле коронавирусот се јавуваат дополнителни компликации, предупреди пред неколку дена и Тадеј Авчин, шеф на Одделот за алергологија, ревматологија и клиничка имунологија на Клиниката за детски болести во Љубљана. Словенечките педијатри досега кај децата откриле околу 50 случаи на необични болести и компликации кај малите пациенти кои ја прележале инфекција со новиот коронавирус.
Најчести меѓу нив се мултисистемски воспалителен синдром кај децата (MIS-C) и воспаление на малите крвни садови поврзани со COVID-19 (васкулитис/васкулопатија), рече Тадеј Авчин.
Педијатрите почнаа да забележуваат такви појави кај децата за време на епидемијата на коронавирус, а досега се појавиле кај 48 деца кои се лекувани на таа клиника. Компликациите кај некои деца се јавуваат две до шест недели по инфекцијата, без разлика дали се симптоматски или асимптоматски.
Мултисистемскиот воспалителен синдром се јавува како резултат на прекумерен имунолошки одговор, најчесто се јавува кај помладата популација, кај здрави деца, кои немале никакви хронични заболувања
Мултисистемскиот воспалителен синдром е предизвикан од прекумерен имунолошки одговор, а децата пред доаѓањето во болница биле здрави и немале хронични болести, рече Авчин, додавајќи дека кај оние кои имале асимптоматска инфекција, компликациите се појавиле подоцна отколку кај оние со изразени симптоми на COVID-19. Мултиорганскиот воспалителен синдром во моментов е најчестата имунолошка (неинфективна) инфламаторна болест кај децата во Словенија, а педијатрите во моментов немаат податоци за долгорочниот тек и можноста за рецидив.
Хоспитализацијата трае околу 14 дена, а кај сите пациенти досега успеавме да го намалиме воспалителниот процес. Но, долгорочните последици, особено врз срцето, може да се проценат шест месеци по појавата на болеста, објасни Авчин.
MIS-C се карактеризира со општ воспалителен одговор на организмот
Болеста е мултисистемска и се карактеризира со општ воспалителен одговор на организмот заради што и најчестиот симптом е температурата, објаснува прим. д-р мед. науки Душко Фидановски, специјалист педијатар – неонатолог.
„Во најголем број од случаи постојат промени по кожата и видливите слузници (осипи и црвенило), а кај две третини од болните постојат знаци од страна на гастроинтестиналниот систем (проливи, повраќање и стомачни тегоби, што го нема кај COVID-19 и делумно го има кај синдромот на Кавасаки). Многу често има знаци за зафаќање на срцето и на крвните садови околу него, дури и кај тие случаи каде нема клинички знаци за тоа. Во случаи на зафаќање на кардиоваскуларниот систем, може да се развие и потешка слика на болеста со слабост, малаксаност, забрзана срцева работа, тешко дишење, градна болка, намалување на крвниот притисок и шок, што за среќа поретко се јавува. За разлика од COVID-19 при MIS-C поретко е зафатен респираторниот систем па поретко се гледа клиничка слика со кашлица, тешко дишење, но опишани се и случаи на класично воспаление на белите дробови. Многу често има промени во коагулацијата на крвта со тенденција кон згуснување на крвта и пречки во циркулацијата, со можност од појава на тромбози и емболии. Исто така може да бидат зафатени и други внатрешни органи, како бубрезите, па да се развие слика на бубрежна слабост, црниот дроб и ЦНС со знаци за главоболка, пореметена свест и конвулзии иако значително поретко“.
