На бремените жени им се менува хемијата во телото, што може да резултира со промена на мирисот, било поради промена во pH рамнотежата, промени во исхраната или хормонални промени
Многу сопственици на кучиња сведочат дека забележале промени во однесувањето на кучето кога член на домаќинството останал во блажена состојба, пишува „Хафингтон пост“.
Некои велат дека кучињата едноставно знаеле дека нивните сопственички се бремени, дури и пред тие самите да го откријат тоа. Но, дали кучето навистина може да ја детектира вашата бременост и како? Експертите за кучиња се обидоа да го објаснат ова.
Иако нема многу истражувања кои би го потврдиле ова тврдење, сепак, постојат неколку студии кои потврдуваат дека постои можност кучињата да ја почувствуваат бременоста на сопственичката.
„Нашите кучиња се одлични набљудувачи. Тие имаат совршено чувство за мирис и вид и не е чудно ако забележат некои промени кога жената е бремена“, објаснува бихевиористот Мери Р. Бурч од американскиот клуб „Кенел“.
Таа вели дека кучињата можат да забележат дека нешто се променило кај сопственичката поврзано со нејзиниот изглед или мирис, а може да забележат и емоционални промени и промени во однесувањето.
„На бремените жени им се менува хемијата во телото, што може да резултира со промена на мирисот, било поради промена во pH рамнотежата, промени во исхраната или хормонални промени. Се менува мирисот на телото и жените кои се борат со утринска мачнина можеби ги прескокнуваат оброците, а резултатот може да биде кетоза што предизвикува лош здив“, објаснува таа.
Кучињата навистина имаат силно чувство за мирис и ги тренираат да можат да намирисаат експлозив или дрога. Истражувањата докажаа дека кучињата исто така можат да мирисаат здравствени промени како што се рак, мигрена, па дури и епилептични напади. Експертите во моментов работат на тоа како да откријат дали кучињата можат да го намирисаат коронавирусот.
-
Способноста на кучето да ја открие бременоста на сопственичката зависи од неговата блискост со неа.
„Кај познати жени, промените во хормоните и мирисот ќе ги забележи порано отколку кај жени кои никогаш не ги сретнал“, вели австралискиот бихевиорист и консултант Кејт Морнемент. „Промените кај жените во исто домаќинство се најочигледни, иако кучето лесно ќе открие промени и кај други, непознати жени“, додава Бурч.
„Покрај тоа што можат да детектираат промени во хормоните, кучињата можат да го слушнат и чукањето на срцето на бебето“, тврди Морнемент.
Иако нема истражување за поддршка на оваа теорија, многу бремени жени ги споделија своите искуства со домашните миленици, сугерирајќи дека тоа е сепак можно. Но, дури и ако забележале промени кај нивната сопственичка, не е јасно дали кучињата можат да ја погодат причината за овие промени и да ги поврзат со новороденчето кое еден ден неговите сопственици ќе го донесат дома.
Како вашата бременост влијае врз кучињата?
Вашата бременост може да влијае на однесувањето и расположението на вашето куче, иако тоа не е секогаш случај.
„Кога бев бремена, нашиот лабрадор не се однесуваше поинаку. Но, имавме и германски боксер кој стана многу вознемирен. Сум слушнала и од клиентите дека однесувањето на нивните миленици се променило кога останале бремени, и тие главно опишуваат дека кучињата биле повеќе нервозни“, вели Морнемент.
Бурч тврди дека промените во однесувањето на човекот може да влијаат и на промените во однесувањето на кучињата.
„Кога жените се бремени, тие честопати се многу заштитнички настроени спрема нероденото дете, често ги држат рацете на стомакот и кучето на кое до тогаш му било дозволено да скока врз нив – сега го оттурнуваат. Затоа, кучето ќе стане почувствително или ќе побара поголемо внимание“, вели Бурч, додавајќи дека нејзината пријателка забележала промени во однесувањето на кучето кога веќе била во поодмината бременост. Сметала дека причината е во тоа што дома го преместувале мебелот и се подготвувале за пристигнување на бебето, а се променил и дневниот распоред на семејството, бидејќи го намалиле времето што го поминувале во вежбање со кучето.
„Во идеална ситуација, мајката и идниот татко нема да заборават на потребите на своето милениче и тоа ќе продолжи да ја добива истата грижа, внимание и активности што му се потребни“, додава Бурч.
