Индија детектираше нова „двоструко мутирана варијанта“ на коронавирусот, објави во средата индиското Министерство за здравство, кое истовремено пријави рекорден дневен број на нови инфекции и смртни случаи од Ковид-19 оваа година.
- Со генетско секвенционирање и анализа на примероците од државата Махараштра се утврдени мутации на вирусот кои не се совпаѓаат со досега познатите „варијанти кои предизвикуваат загриженост“, се вели во официјалното соопштение
Махараштра е една од најсилно погодените со вирус индиски држави.
Иако варијантите кои предизвикуваат загриженост и нова двоструко мутирана варијанта се пронајдени во Индија, тие не се детектирани во бројки што би биле доволни за да се воспостави или директна врска или да се објасни брзото зголемување на случаите во некои земји, се вели во соопштението.
Индија веќе пријави неколку случаи на британската варијанта на вирусот, како и варијанти од Јужна Африка и Бразил.
- Во меѓувреме, руските експерти издвоија нова верзија на јужноафриканската варијанта на вирусот, пренесува руската државна новинска агенција „Спутник“
Варијантата ја издвоија експерти од Државниот научен центар за вирусологија и биотехнологија.
Секвенционирањето на геномите покажа, покрај мутациите карактеристични за јужноафриканската варијанта, и присуство на две дополнителни мутации во гените ORF1ab и S, се вели во соопштението на федералната агенција за заштита на потрошувачите „Роспотребнадзор“.
