Поставувањето граници во животот на децата има многу придобивки, но понекогаш родителите прават грешки за кои не се ни свесни. Едукаторката за развој Тања Хрватин Шимичиќ укажува на трите најчести грешки што ги прават родителите кога станува збор за поставување на граници на децата.
Родителите имаат погрешни очекувања
Како прва грешка на родителите, едукаторката истакнува дека родителите имаат погрешни очекувања од своите деца.
„Очекувате детето да може да се контролира и да послуша секогаш кога ќе поставите граница, а не можете да се контролирате ниту вие. Се сеќавате кога последен пат сте викале, а знаете дека тоа има лош ефект на детето. Е, тоа е тоа. Детскиот мозок сè уште се развива, што значи дека треба да се очекуваат непожелни однесувања, а на детето му треба родител кој води со поставување на граници и доследност. Не со казни“, вели Хрватин Шимичиќ
Родителите не се доследни
Родителите треба да бидат доследни во спроведувањето на границите и правилата, посочува едукаторката.
„Сто пати му велите дека нешто не смее да прави или да прави нешто, а на крајот се лутите и карате како две деца, наместо да делувате. Ако не сака да го исклучи ТВ, а сте му рекле да го исклучи, отидете и исклучете го. Тоа се вика доследност. Притоа не мора да се нервирате. Вие му помагате на вашето дете да развие самоконтрола. Ако кажете дека е време за спиење, а вашето дете не сака , тоа е негова желба, а не негова потреба. Вие водите“, наведува таа.
Детето мора да биде среќно
„Ваша задача е да поставите граници, а задача на детето е да се спротивстави на тие граници, да плаче, да не се согласува со тоа, да биде тажно затоа што светот му се срушил кога сте рекле дека не може да јаде слатки. Тоа не значи дека сте лоша мајка или татко и дека вашето дете страда и ќе биде оштетено“, објаснува едукаторката и го издвојува тоа како трета најчеста грешка што ја прават родителите.
