Речиси и да нема мајка која барем еднаш не објавила фотографија од своето бебе со име и датум на раѓање. Раѓањето на дете е огромен, емотивен момент и сосема е природно да сакате да го споделите со луѓето што ги сакате.
Но, според експерти за родителство и дигитална безбедност, токму тоа е една од најризичните работи што родителите ги објавуваат на социјалните мрежи – често без воопшто да размислат за последиците.
Дали објавата за раѓање е најризичната работа што можете да ја споделите онлајн?
Советничката за родители Лусинда Роуз предупредува дека родителите треба двапати да размислат пред да објават раѓање или роденден на детето на социјалните мрежи.
„Објавите за раѓање и роденден се две од најопасните работи што родител може да ги стави онлајн“, вели таа.
Зошто? Затоа што на криминалците им се потребни податоци. А идентитетот најчесто се краде токму преку комбинација од полно име и датум на раѓање – информации кои родителите гордо ги споделуваат веднаш по доаѓањето на бебето на свет.
Она што вам ви изгледа како безазлена и среќна вест, за некој друг може да биде вредно парче од сложувалката.
Ризикот од кражба на идентитет е реален
Во последно време сè почесто се зборува за пораст на онлајн измами и кражби на идентитет. Финансиската институција Barclays предупредува дека до 2030 година дури две третини од сите случаи на кражба на идентитет би можеле да бидат поврзани со информации собрани преку социјалните мрежи.
Експертката за дигитална безбедност Џоди Гилберт, истакнува:
„Никогаш не било полесно за измамниците да ги соберат клучните податоци потребни за кражба на нечиј идентитет. Важно е да размислите пред да објавите и редовно да ги проверувате поставките за приватност на вашите профили.“
Дали е доволно да го покриете лицето со емотикон?
Многу родители се обидуваат да ја заштитат приватноста на децата така што на фотографиите го покриваат лицето со емотикон. Но експертите предупредуваат дека тоа можеби не е доволно.
Името, датумот на раѓање, местото, семејните врски и други детали и понатаму остануваат достапни – а токму тие информации можат да се поврзат и злоупотребат.
Во дигиталниот свет во кој живееме, сакале или не, родителите се соочуваат со сериозни одлуки.
Тоа не значи дека треба целосно да исчезнете од социјалните мрежи. Но можеби значи дека вреди да застанете на момент и да се запрашате: Колку информации за моето дете сакам засекогаш да бидат достапни онлајн?
Зашто додека вие гледате спомен – некој друг можеби гледа податоци.
