Постојат верувања дека денот на раѓање може да влијае на животот на детето, па некои денови се сметаат за подобри за раѓање од некои други. Сепак, за тоа нема никакви научни докази, но секако може да се забавувате читајќи што открива денот на раѓање за детето.
Понеделник
Првиот ден од неделата воедно се смета и за најсреќен, а се верува дека дете родено во понеделник ќе има долг и среќен живот.
Бидејќи тогаш почнува нова недела, овој ден е идеален за започнување на какви било работи и активности. Христијаните веруваат дека Бог го започнал создавањето на светот во понеделник, па затоа е добро човек да започне некој значаен потфат токму на овој ден. А што е позначајно од донесување нов живот на свет…
Вторник
Овој ден се смета за најмалку среќен за раѓање и се верува дека родените на овој ден нема да имаат лесен живот. Се верува дека овој ден е ‘баксузен’, и дека на овој ден не треба да се започнува ништо ново. Во прилог на тоа колку вторник се смета за негативен во нашите народни верувања говори и фактот што во народниот календар се означени вторник – деветти вторник, црн вторник.
Среда
Се верува дека децата родени во среда ќе бидат просперитетни и здрави и дека е добар ден за започнување нови бизниси. Исто така, постои верување дека детето кое ќе прооди во среда ќе биде среќно и богато.
Четврток
И овој ден се смета за среќен, а се верува дека децата родени во четврток секогаш ќе бидат среќни и успешни. Во минатото, работата на полињата започнувала во четврток, а во претхристијанско време се славел како ден на плодноста.
Петок
Слично на вторник, ниту петок не се смета за баш среќен ден – сигурно сте слушнале дека кога некому не му оди добро во животот, му велиме дека му „дошол црн петок“. Во некои делови во земјава овој ден дури се смета за нечист, па се верува дека во петок не треба да се започнува никаква работа. Слично на ова, и за дете родено на овој ден во неделата, се верува дека нема да има среќа во животот.
Сабота
Се верува дека дете родено на овој ден од неделата ќе биде необично, односно ќе биде ‘имуно’ на „лоши луѓе“. Постои верување дека децата родени во сабота можат да научат невербален јазик, да разговараат со животни и да бидат ‘видовити’.
Недела
Неделата традиционално е ден за одмор, па затоа кај нашиот народ постојат различни верувања кои се однесуваат на одмор и поминување време со семејството. Старите ја замислувале неделата како женско суштество – Света Недела, а се верува дека децата родени на овој ден ќе бидат исклучително среќни, и дека често ќе одмoраат, дека „секој ден ќе им биде како недела“.
