Првите зборови на детето се голема пресвртница во животот, но и тема која предизвикува голема љубопитност кај научниците. Тие неодамна утврдиле дека првите зборови на бебето се предизвикани од она што бебето го гледа, а нивните откритија дополнително го објаснуваат развојот и учењето на говорот кај децата.
Повеќето родители ги слушаат првите зборови на своето бебе неколку месеци пред нивниот прв роденден. И иако првите зборови често се „мама“ и „тато“ или слатки верзии на тие зборови, што е со остатокот од речникот на бебето?
Според истражување спроведено на Универзитетот Индијана, родителите можат да го предвидат раниот вокабулар на детето со набљудување на сето она што бебето го гледа во својот секојдневие. Со други зборови, бебињата поверојатно учат зборови на предмети кои често се наоѓаат во нивното видно поле.
“Визуелната меморија може да биде клучот за учење зборови, на пример визуелни предмети кои постојано се во видното поле на детето, како маса, маица, шише или лажица“, вели Линда Смит, авторка на истражувањето и додава дека се работи за агрегирано или збирно искуство, односно ако детето често гледа некој предмет – поголема е веројатноста да го препознае и на крајот да поврзе збор со него.
Околината за време на оброкот е важна бидејќи постојано вклучува мал број предмети, а имињата на овие предмети се меѓу првите зборови што ги учи детето. Поради ова, научниците заклучиле дека визуелното искуство е исклучително важно во учењето нови зборови и покрај воспоставеното мислење, првите зборови немаат толку врска со она што детето често го слуша, туку со она што детето често го гледа, бидејќи поважно е детето да види одреден предмет отколку да ги слушне родителите како покажуваат кон некој предмет и го кажуваат неговото име.
Први “вистински“ зборови
“Првиот збор со значење се јавува околу една година, односно помеѓу деветтиот и 15. месец и тогаш започнува периодот на зборување, во кој детето почнува активно да ги користи говорот и јазикот. Помеѓу осумнаесеттиот и дваесеттиот месец детето почнува да ги составува првите реченици и нагло да го проширува речникот, со околу 50 нови зборови месечно, па на две и пол години знае околу 1.000“, објаснуваат логопедите.
