Британскиот министер за здравство Мет Хенкок изјави дека е крајно загрижен за новата јужноафриканска варијанта на коронавирусот
Научниците не се целосно сигурни дека вакцините против COVID-19 ќе бидат ефикасни во случај на новата верзија на коронавирусот што се појави во Јужна Африка, изјави политичкиот уредник на британската комерцијална ТВ мрежа ITV, повикувајќи се на информации добиени од неименуван научен советник на британската влада, пренесува „Хина“.
Британскиот министер за здравство Мет Хенкок изјави дека е крајно загрижен за новата јужноафриканска варијанта на коронавирусот.
„Според информациите што ги добив од владиниот научен советник, причината за „екстремната“ загриженост на Мет Хенкок во врска со јужноафриканската верзија на COVID-19 е тоа што не е познато дали вакцините ќе бидат подеднакво ефикасни против оваа варијанта, колку што се делотворни против британскиот сој на коронавирусот“, изјави Роберт Пестон од ITV.
Во Велика Британија и Јужна Африка се откриени нови варијанти на коронавирус, што доведе до нагло зголемување на бројот на новоинфицирани случаи во последните месеци.
Научниците објаснија дека новата јужноафриканска варијанта се разликува од другите кои циркулираат низ светот со тоа што има повеќе мутации на важниот шилест протеин, кој вирусот го користи за да навлезе во човечката клетка.
Експертите исто така ја поврзуваат и со поголемо вирусно оптоварување, што значи и поголема концентрација на вирусни честички во организмот на пациентот, а тоа може да влијае на повисоко ниво на пренос на вирусот.
Џон Бел, професор на Универзитетот во Оксфорд и член на владината работна група за вакцини, во неделата изјави дека мисли дека сите вакцини ќе делуваат на британската варијанта, но дека постои „голем прашалник“ кога станува збор за јужноафриканската верзија на коронавирусот.
Тој за „Радио Тајмс“ рече дека доколку се утврди дека вакцините не делуваат на јужноафриканската варијанта, тие можат да бидат прилагодени, а процесот треба да биде пократок од една година.
Бел верува дека „правењето нова вакцина може да потрае еден месец или шест недели“.
