Ваквиот тренинг може да помогне во поправка заснована на невропластичност – способност на мозокот да се реорганизира за да ја компензира промената или повредата
Ако сте искусиле изобличување на мирисот после COVID-19, тогаш „тренингот за мирис“ може да ви помогне повторно да почнете да мирисате нормално, покажува новото истражување.
Паросмија подразбира необични и непријатни нарушувања на мирисите. На пример, наместо мирис на лимон, може да намирисате скапана зелка, или чоколадото да ви мириса на бензин. Ова се појавува кај луѓе заболени од COVID-19, но паросмијата може да биде предизвикана и од други вируси и повреди на главата.
Истражувањето покажа дека тренингот за мириси, односно идентификување и разликување на мириси, им помогнал на пациентите кај кои вирусот предизвикал губење на мирисот.
„Се смета дека одреден степен на губење на мирисите погодува околу една четвртина од популацијата. Губењето на мирисот е исто така изразен симптом на COVID-19, а се знае дека пандемијата остава многу луѓе со долгорочно губење на мирисот или негово изобличување, нарушување како што е паросмијата“, изјави проф. Карл Филпот од UEA Norwich Medical School.
„Тренинг на мирисот“
Тој објасни дека за луѓето кои имаат паросмија, мирисот на некои работи е необичен и честопати непријатен.
„Лицето со паросмија може да мириса стапче од цимет, но наместо тоа да почувствува нешто друго како трула храна или уште полошо. Тренингот на мирис вклучува мирисање најмалку четири различни мириси двапати на ден секој ден во тек на неколку месеци“, вели Филпот.
Ваквиот тренинг може да помогне во поправка заснована на невропластичност – способност на мозокот да се реорганизира за да ја компензира промената или повредата. Истражувачкиот тим работел со 143 учесници кои го изгубиле или имале промена во чувството за мирис поради пост-вирусна инфекција.
Учесниците добиле различни комплети за тренирање на мирисот кои се состоеле од различни мириси, вклучувајќи еукалиптус, лимон, роза, цимет, чоколадо, кафе, лаванда, мед, јагода и мајчина душица. Било проверено колку добро учесниците можат да ги разликуваат мирисите на почетокот на обуката и по шест месеци, пренесува „News medical“.
Филпот наведува дека истражувањето покажало значително закрепнување кај учесниците и дека најголемите подобрувања се случиле кај оние кои изгубиле најмногу функции на мирис. Истражувањето било спроведено пред пандемијата, но истражувачите велат дека нивните откритија би можеле да бидат корисни за луѓето кои го изгубиле чувството за мирис поради COVID-19.
