Посетите на истиот лекар од општа пракса во период од најмалку 15 години ја намалуваат шансата за смрт во наредните 12 месеци за една четвртина, во споредба со луѓето кои го познаваат лекарот помалку од една година, покажа голема студија.
Новата студија се базира на податоци од околу пет милиони пациенти во Норвешка
Градењето долгорочен однос со матичниот лекар го намалува ризикот од хоспитализација поради неколку болести, вклучувајќи срцеви заболувања и дијабетес, открива истражувањето објавено во британскиот часопис „Private Practice“.
Пациентите кои имале ист матичен лекар 15 години или повеќе, имале 30 проценти помала веројатност за потреба од здравствени услуги надвор од работното време, а 28 проценти имале помали шанси да бидат примени во болница. Придобивките се зголемуваат колку подолго пациентот го познава својот лекар, тврдат норвешките научници кои стојат зад истражувањето.
„Ако го напуштите матичниот лекар кој сте го имале повеќе од 15 години, ризикот дека ќе мора да бидете примени во болница или смрт ќе се зголеми значително следната година“, објаснува професорката Хогне Сандвик од Универзитетот во Берген.
Експертите веруваат дека причината може да биде тоа што пациентите градат доверба со еден лекар од општа пракса, не мора да ја повторуваат својата приказна, се чувствуваат сигурно во разговорот со истиот лекар и полесно се снаоѓаат во здравствениот систем.
Новата студија се базира на податоци од околу пет милиони пациенти во Норвешка. Истражувачите анализирале колку долго пациентите биле пријавени кај истиот општ лекар, споредувајќи го тоа со стапката на прием во болница и смртни случаи во 2018 година.
