Во време кога цените на детската опрема, облеката и играчките постојано растат, многу родители се одлучуваат за половни или наследени предмети. Но, стручњаците предупредуваат дека некои производи, иако на прв поглед изгледаат во добра состојба, можат да претставуваат сериозен ризик за безбедноста на детето, пишува Daily Mail.
Користењето половни работи може да биде одличен начин за заштеда и одржлив пристап, но не сите предмети се подеднакво безбедни. Организацијата за заштита на потрошувачи Which? издвојува неколку производи што никогаш не треба да се користат од втора рака.
Автоседишта
Иако половно автоседиште може да изгледа сосема исправно, можно е претходно да било вклучено во сообраќајна несреќа или да паднало, што може да предизвика невидливи внатрешни оштетувања. Таквите оштетувања, како микропукнатини, можат сериозно да ја нарушат безбедноста при судир.
Покрај тоа, материјалите како ремените може со текот на времето да ослабат, особено ако се чистени со силни средства. Постарите модели често не се усогласени со новите безбедносни стандарди, а недостигот од оригинални упатства дополнително го зголемува ризикот од неправилно поставување. Загрижувачки е што 22 проценти од родителите признале дека користат половно автоседиште.
Половни душeци
Душеците за бебињски креветчиња исто така можат да бидат опасни, особено ако не доаѓаат од вашето домаќинство. Организацијата The Lullaby Trust предупредува дека половните душeци можат да го зголемат ризикот од синдром на ненадејна смрт кај новороденчињата.
Ако сепак се одлучите за користен душек, важно е да се провери дали има водоотпорна навлака и дали е темелно исчистен и исушен. Душекот мора да биде цврст и рамен и веднаш да се враќа во првобитната форма по притискање. Исто така, треба совршено да одговара на креветчето, без празнини по рабовите, за да се избегнат можни повреди.
Кациги
Како и автоседиштата, велосипедските кациги не треба да се купуваат половни. Иако може да изгледаат неоштетено, невозможно е да се знае дали претходно претрпеле удари или падови кои можат да ја ослабат нивната структура.
Безбедносниот стандард EN1080 и ременот за брадата што лесно се откопчува се важни елементи на кои треба да се обрне внимание при купување. Новата кацига гарантира целосна безбедност, додека половната може да биде ризична, дури и ако изгледа исправно.
Што може безбедно да се купи половно?
И покрај сè, постојат предмети што се сметаат за безбедни за купување од втора рака, под услов да се во добра состојба и да ги исполнуваат безбедносните стандарди. Тоа вклучува детски колички, креветчиња, заштитни огради за скали и детски мебел. Со дополнителна претпазливост може да се разгледа купување на носилки за бебиња, играчки, детска облека, шишиња, пумпи за млеко и беби-монитори.
