Сигурно повозрасните паметат како децата по цел ден си играле надвор? Имале многу другарчиња, играле различни игри, од кои најчесто убаво се препотувале и во кои фантазијата имала главна улога. Денешните деца живеат потполно поинаков живот. Колку и да биле неспоиви поимите деца и работа, денешните деца се навистина презафатени.
Децата немаат слободно време – Меѓу градинка/училиште, спортски активности, ликовни работилници, странски јазици, денешните деца немаат слободно време, што воопшто не е добро, предупредуваат стручњаците.
„Слободното време им помага на децата да научат самите да си се организираат, им помага да ги развиваат социјалните вештини и емоции кои, како возрасни, ќе им помогнат да изградат односи со другите„, објаснува американскиот педијатар Роберт Миреј.
Според студијата објавена во американското научно списание Pediatrics, времето во кое децата некогаш си играле на улица или на игралиште, денес е пополнето со други активности.
Стручњаците предупредуваат дека тоа може лошо да влија на децата – ментално, физички, психички и социјално.
Времето поминато пред екраните драстично пораснало – Компјутери, паметни телефони, таблети и телевизија се составен дел од детството денес. Времето кое децата го поминуваат пред екраните драстично е зголмено во споредба со поранешните генерации. Едно истражување покажало дека во средина на 90-тите години децата на возраст од 5 до 16 години во просек дневно поминувале пред екрани по три часа, додека во 2015 година таа бројка изнесувала 6,5 часа на ден.
Децата се помалку време поминуваат надвор – Една бритаска студија покажала дека денешните деца поминуваат за половина помалку време играјќи надвор, отколку што тоа го правеле нивните родители. Тоа може лошо да влијае на здравјето на децата заради тоа што не се физички активни и им недостасува витамин Д.
Денешните деца помалку спијат – Покрај тренинзите, час по математика, час по клавир и други обврски, на децата им останува, преку ден, помалку време за одмор. Децата на возраст од 6 до 13 години преку ноќ треба да спијат од 9 до 11 часа, а тие од 14 до 17 години, од 8 до 10 часа. Според американската студија, 58% од основците и 72% од средношколците не спијат доволно
Децата денес се преоптоварени со задачи – Домашната задача служи за децата да се научат на одговорност, но премногу домашна лошо влијае на децата. Психолозите велат дека се што е повеќе од четири часа неделно домашна задача, е премногу. Истражување спроведено на Универзитетот во Мичиген покажало дека во период од 17 години, обемот на домашната задача се дуплирал.
Судејќи по се, денешните деца се преоптоварени со обврски, а слободното време го поминуваат на интернет и пред екран. Премалку си играат надвор со врсниците и премалку спијат. Сето ова лошо влијае на нивниот развој.
