Секој родител знае дека бебињата плачат главно од две причини: кога треба да се нахранат или кога треба да им се смени пелената. Меѓутоа, бебињата имаат различни темпераменти – некои имаат тенденција да плачат многу, додека други бебиња не плачат толку. Сепак, штом ќе се реши проблемот, најчесто плачењето престанува.
Но, приказната често може да биде поинаква: кога сте пробале речиси сè, а бебето сè уште има очи полни со солзи. За бебињата на возраст од три месеци или помлади, виновникот може да биде коликите – а тие се дефинирани како: ако бебето плаче повеќе од три часа дневно со растојание од најмалку три дена, што обично трае додека детето не наполни три месеци.
Според најновите мета-анализи на студии објавени во The Journal of Pediatrics, бебињата во Велика Британија, Канада и Италија плачат повеќе од бебињата во другите земји, додека оние од Данска, Германија и Јапонија плачат најмалку. Тоа е првата универзална табела што ја прикажува типичната дневна должина на плачењето на бебињата во првите три месеци од животот.
Истражувачите од Универзитетот во Ворвик анализирале речиси 8.700 бебиња и откриле дека тие плачат во просек околу два часа дневно во првите две недели. Плачењето го достигнува максимумот на шест недели, трае околу два часа и 15 минути на ден, но се намалува на просек од еден час и 10 минути во 12-та недела. Меѓутоа, студијата покажала и дека има новороденчиња кои плачат само 30 минути, додека има и такви кои плачат повеќе од пет часа на ден.
„Во првите недели од животот, бебињата многу се разликуваат по тоа колку плачат“, вели Дитер Волкер, кој го водел истражувањето на Универзитетот во Ворвик. „Можеме да научиме повеќе со проучување на општествата каде што помалку плачат, вклучително и дали тоа е начинот на кој постапуваат родителите или други фактори поврзани со бременоста и генетиката“, додава тој.
Вокер вели дека „табелата за плачење“ може да им помогне на здравствените работници да комуницираат со родителите за тоа дали бебето плаче премногу во првите три месеци од животот и дали му е потребна дополнителна поддршка.
