Американската академија за педијатрија, претставила нови насоки според кои кикириките треба што порано да им се понудат на децата, токму за да се намали бројот на алергиски реакции.
Всушност, повеќе студии спроведени последниве години ја покажале придобивката од раното воведување на кикирики кај високоризичните бебиња, на возраст од 4 до 6 месеци, но со соодветен медицински надзор. Бебињата кои не спаѓаат во потенцијална високоризична група може да почнат да консумираат кикирики со навршени шест месеци или подоцна, следејќи го образецот на вообичаената семејна исхрана.
Но, како да знаете дека детето е во високоризична група, односно дека може да биде алергично на кикирики, се прашуваат родителите.
Индикациите за тоа, одговараат стручњаците, се алергија на јајца и сериозна егзема. Тие прелагаат разговор со педијатар и спроведување на одредени тестови за да се утврди алергијата и истата да се потврди, и да се одреди најдоброто време за “пробување кикирики“.
При тоа, треба да се има предвид дека на детето не смеете да му давате цела кикирика, поради ризик од гушење. Почнете на пример со кикирики во прав, смелени во кашичка или лесен намаз од путер од кикирики на леб. Со оглед дека густиот путер може да биде претежок за малата уста кај детето, лекарите советуваат разредување со малку топла вода. Кога еднаш ќе воведете кикирики во исхраната, најдобро е да продолжите да ги давате, а не да заборавите на нив. Постојаното повторување на некои намирници ја намалува можноста од појава на проблем.
Некои од симптомите на алергија на кикирики може да бидат:
- Отекување на усните
- Кашлица
- Повраќање или осип (кој изгледа како убод од комарец) околу устата или други делови на телото
Симптомите обично се појавуваат веднаш по јадењето кикирики.
