Промените во бременоста никогаш не се занемарливи. Цел спектар работи се менува во текот на тие девет месеци, а некои никогаш не се враќаат во својата „стара“ состојба. Претходните истражувања покажаа дека женскиот организам всушност старее за време на бременоста, а се претпоставуваше дека станува збор за неколку месеци или – најмногу – две години. Новите истражувања ги изненадија научниците.
Најновата студија открила дека бременоста го забрзува епигенетското стареење за дури 5,3 години кај жени кои претходно не родиле, пренесува Медскејп. Дополнително, повисоката епигенетска возраст во првиот триместар е поврзана со низа компликации во бременоста, иако тоа не е случај со хронолошката возраст. Епигенетската возраст е мерка за биолошката возраст на нашите клетки, која не мора секогаш да биде иста како нашата календарска возраст.
„Нашите резултати покажуваат дека биолошкото стареење може да служи како објективна мерка за тоа како бременоста може да биде прозорец кон идното здравје, бидејќи знаеме дека луѓето кои развиваат гестациски дијабетес или хипертензивни нарушувања можат да имаат зголемен ризик од овие состојби подоцна во животот“, изјавила водечката авторка д-р Даниела Панели, за Медскејп Медикал Њуз.
Стапките на смртност кај мајките во САД ги надминуваат оние во другите земји со висок приход, а се смета дека еден од причинителите е наглиот пораст на бремености кај жени постари од 40 години. Една студија покажала пораст од 194% на деца родени од постари жени во САД од 1989 година. Иако повозрасната возраст е добро познат фактор на ризик за компликации во бременоста, ова ново истражување, објавено во списанието Obstetrics & Gynecology, покажува дека самата хронолошка возраст не може точно да ги предвиди неповолните исходи.
Поврзаност на компликациите и „стареењето“
„Најинтересниот дел кај епигенетската возраст, или било кој тип биолошка возраст, е тоа што, за разлика од хронолошката возраст, таа може да се менува. Идеално би било ова да се примени во клиничката практика – ако знаете дека некој има забрзана епигенетска возраст во раната бременост, можете порано да започнете со промени во начинот на живот, пред да се развијат потенцијалните компликации“, вели д-р Панели.
За време на студијата, истражувачите земале примероци од крв од учесничките при прием, првиот ден по породувањето и 7 месеци по породувањето, и во секој момент ја мереле епигенетската возраст.
Панели и нејзините колеги ја испитале поврзаноста меѓу епигенетската возраст во првиот триместар и компликациите во бременоста. Кај повеќе од половина од жените било утврдено значително епигенетско забрзување на возраста во споредба со жените кои не биле бремени.
Дополнителното епигенетско стареење се движело од 1,58 до 5,28 години. Секоја дополнителна година стареење во првиот триместар ја зголемувала веројатноста за компликации во бременоста за 36%, додека не била пронајдена поврзаност со хронолошката возраст.
„Мислам дека ова истражување е навистина револуционерно и покажува како во иднина ќе ја обезбедуваме грижата за мајките, фокусирајќи се на индивидуалната личност и молекуларните нивоа на нејзините ризик-фактори“, заклучуваат авторите на студијата.
